અમેરિકાની ફેડરલ કોર્ટે પેલેસ્ટિનિયન સંગઠન હમાસ પર ઈઝરાયેલમાં આતંકવાદી હુમલા કરવાનો આરોપ લગાવ્યો છે. હુમલાને લઈને ફેડરલ કોર્ટમાં દાખલ કરવામાં આવેલી ચાર્જશીટમાં હમાસના વડા યાહ્યા સિનવર અને રાજકીય નેતા ઈસ્માઈલ હનિયા સહિત છ નેતાઓના નામ સામે આવ્યા છે. ઈસ્માઈલની તાજેતરમાં તેહરાનમાં હત્યા કરવામાં આવી હતી.
૧ ફેબ્રુઆરીએ કોર્ટમાં દાખલ કરવામાં આવેલી ચાર્જશીટમાં છ આરોપીઓ પર આતંકવાદી હુમલાને અંજામ આપવા અને હુમલામાં મદદ કરવાનો આરોપ મૂકવામાં આવ્યો છે. જેમાં આરોપીઓની ધરપકડ કરવા માટે કહેવામાં આવ્યું છે. યુએસ એટર્ની જનરલ મેરિક ગારલેન્ડે જણાવ્યું હતું કે આ આરોપો હમાસની પ્રવૃત્તિઓના દરેક પાસાને ઉજાગર કરવાના પ્રયાસનો એક ભાગ છે. અમારી કાર્યવાહી અંત સુધી ચાલુ રહેશે. ચાર્જશીટમાં યાહ્યા સિનવર અને અન્ય હમાસ નેતાઓ પર દાયકાઓથી સામૂહિક હિંસા અને આતંકવાદી હુમલા કરવાનો આરોપ મૂકવામાં આવ્યો છે.
૭ ઓક્ટોબર, ૨૦૨૩ ના રોજ, હમાસે ઇઝરાયેલના વિસ્તારો પર હુમલો કર્યો, તેની માનવામાં આવતી અભેદ્ય સુરક્ષા વ્યવસ્થાને તોડી નાખી. આ હુમલામાં લગભગ ૧૨૦૦ ઈઝરાયેલના મોત થયા હતા અને ૫૦૦૦થી વધુ લોકો ઘાયલ થયા હતા. આ દરમિયાન હમાસના લડવૈયાઓએ ગાઝામાં લગભગ ૨૫૦ લોકોને બંધક બનાવ્યા હતા. આમાંના ઘણા બંધકોને બચાવી લેવામાં આવ્યા છે જ્યારે ગાઝામાં ૧૦૧ લોકો હજુ પણ બંધક છે.
દાવાઓ અનુસાર, ઇઝરાયેલના જવાબી હુમલામાં ૪૦,૦૦૦ થી વધુ પેલેસ્ટિનિયનો માર્યા ગયા છે. યુએનના આંકડા અનુસાર ગાઝાના ૨.૪ મિલિયન લોકોમાંથી ૨ મિલિયનથી વધુ લોકો તેમના ઘરોમાંથી વિસ્થાપિત થયા છે, જેમાંથી અડધા બાળકો છે. ૭ ઓક્ટોબર, ૨૦૨૩ ના હુમલા પછી, ઇઝરાયેલે હમાસને નાબૂદ કરવાનું વચન આપ્યું હતું. આ માટે ઈઝરાયેલની સેનાએ ગાઝામાં હવાઈ અને જમીની હુમલા કર્યા હતા.
આ રીતે, હમાસ અને ઇઝરાયેલ વચ્ચે છેલ્લા ૧૧ મહિનાથી લોહિયાળ યુદ્ધ ચાલી રહ્યું છે. જો કે, ઘણા દેશોના પ્રયાસોને કારણે, બંને પક્ષો વચ્ચે યુદ્ધવિરામને લઈને વાતચીત થઈ છે, પરંતુ હજી સુધી અંતિમ નિર્ણય લેવામાં આવ્યો નથી.