અમદાવાદ, રોડ પર ખતરનાક સ્ટંટ કરવો જીવલેણ બની શકે છે, તેની ખબર હોવા છતાં પણ યુવાનો અટક્તા નથી અને અવારનવાર રોડ પર સ્ટંટની ઘટનાઓ સામે આવતી હોય છે. ત્યાર અમદાવાદથી ફરી જોખમી સ્ટંટનો વીડિયો વીડિયો વાયરલ થયો છે. વીડિયોમાં મોપેડ પર બે યુવકો જોખમી સ્ટંટ કરી રહ્યા છે. જોખમી સ્ટંટ કરનારા યુવકોની ધરપકડ ક્યારે થશે તે મોટો સવાલ છે.
અમદાવાદના સિંધુ ભવન રોડ પર અવાર નવાર સ્ટંટ કરતાં વીડિયો વાયરલ થાય છે. ત્યારે આજે ફરી સિંધુ ભવન રોડ પરનો મોપેડ સ્ટંટનો વીડિયો સામે આવ્યો છે. જેમાં બે યુવકો મોપેડ પર જોખમી સ્ટંટ કરીને પોતાનો અને અન્ય લોકોનો જીવ જોખમમાં મૂકી રહ્યા છે. સ્ટંટ કરનારા યુવકોએ મોપેડની નંબરપ્લેટ સાથે પણ છેડછાડ કરી છે. તેઓ પકડાય નહી તે માટે મોપેડની નંબર પ્લેટ સાથે છેડછાડ કરવામાં આવી છે. અતિ વ્યસ્ત અને હાઇપ્રોફાઈલ રોડ પર યુવાનો આવા જોખમી સ્ટંટ કરીને પોલીસને પડકાર ફેંકી રહ્યા છે. આપને જણાવી દઈએ કે, આ પહેલા સિંધુભવન રોડ પર સ્ટંટના અનેક વીડિયો વાયરલ થઈ ચૂક્યા છે.
નોંધનીય છે કે, દીવાળીના તહેવારમાં કેટલાક યુવાનોએ સિંધુ ભવન રોડ ઉપર લોકોના જીવ જોખમમાં મૂકાય તે રીતે રોડ પર આડેધડ વાહનો ફેરવી ફટકાડા ફોડ્યા હતા. ખુલ્લી જગ્યામાં ફટાકડા ફોડવાના બદલે આ યુવાનોએ સિંધુભવન રોડ પર જ ફોડવાનું શરૂ કર્યું હતું. હંમેશા લોકોથી ધમધમતા સિંધુભવન રોડ પર દિવાળીની રાત્રે મોટા માં-બાપના નબીરાઓએ પોલીસ કે કાયદાનો કોઇ ડર જ ના હોય તેમ ગાડીમાં સવાર થઇ ગયાં અને ગાડીની ઉપર ફટાકડાનું બોક્સ મૂકીને ફટાકડા ફોડ્યા હતા. જેનો વીડિયો વાયરલ થયા બાદ સરખેજ પોલીસે આરોપીઓની ધરપકડ કરી કાયદાનું ભાન કરાવ્યું હતું.