અમદાવાદ, અમદાવાદમાં પથ્થરમારાની અફવા ફેલાવવા બદલ પોલીસે ૩ લોકોની ધરપકડ કરી છે. સાયબર ક્રાઈમ બ્રાન્ચના એક અધિકારીએ આપેલી માહિતી અનુસાર, આ ત્રણેય સોશિયલ મીડિયા પર અમદાવાદના એક વિસ્તારમાં પથ્થરમારાની અફવા ફેલાવી હતી. જણાવી દઈએ કે અમદાવાદમાં ભૂતકાળમાં ઘણી વખત કોમી રમખાણો ફાટી નીકળ્યા છે, તેથી આવી કોઈ અફવા ખૂબ જ ખતરનાક સ્વરૂપ ધારણ કરી શકે છે.
સાયબર ક્રાઈમ દ્વારા જારી કરાયેલી અખબારી યાદી મુજબ, પોલીસને મંગળવારે મોડી રાત્રે માહિતી મળી હતી કે વાસણા વિસ્તારના ગુપ્તા નગર વિસ્તારમાં કેટલાક અજાણ્યા શખ્સોએ પથ્થરમારો અંગે વોટ્સએપ પર મેસેજ વાયરલ કર્યો હતો. જ્યારે વાસણા પોલીસ ગુપ્તા નગર વિસ્તારમાં પહોંચી તો આ દાવો ખોટો નીકળ્યો. પોલીસ દ્વારા નોંધાયેલી ફરિયાદના આધારે, વાસણાની સાયબર ક્રાઈમ બ્રાન્ચે બુધવારે સવારે અફવાઓ ફેલાવવા બદલ અજાણ્યા વ્યક્તિઓ વિરુદ્ધ હ્લૈંઇ નોંધી હતી. પોલીસ ઈન્સ્પેક્ટર બીએમ પટેલે જણાવ્યું કે, તપાસ બાદ સાઈબર ક્રાઈમ બ્રાન્ચે ૩ લોકોની ધરપકડ કરી હતી. આ લોકોએ જાણી જોઈને વિવિધ વોટ્સએપ ગ્રુપમાં અફવા મોકલી હતી.
અહેવાલો અનુસાર, ધરપકડ કરાયેલા આરોપીઓ સામે આઇપીસીની કલમ ૫૦૫ (૧) હેઠળ લોકોમાં ભય અથવા ચિંતા ફેલાવવાના હેતુથી કોઈપણ નિવેદન, અફવા અથવા અહેવાલ પ્રકાશિત કરવા અથવા ફેલાવવા સંબંધિત ગુનાઓ માટે કેસ દાખલ કરવામાં આવ્યો છે. ત્રણ આરોપીઓની ઓળખ જમાલપુર વિસ્તારના રહેવાસી ઓજેફ તિર્મીજી, ઈકબાલ અહેમદ ગોટીવાલા અને જુનૈદ નિલગર તરીકે થઈ છે. તમને જણાવી દઈએ કે અમદાવાદમાં ૧૯૬૯ અને ૨૦૦૨માં મોટા પાયે રમખાણો થયા છે જેમાં ડઝનેક લોકોએ જીવ ગુમાવ્યા છે, આવી સ્થિતિમાં અફવાની એક નાની ચિનગારી પણ શહેરને હિંસાની આગમાં ધકેલી શકે છે.