જાણીતી અમેરિકન મોડેલ બેલ્લા હદિદને સ્પોર્ટ્સ બ્રાન્ડ એડીડાસે મોડેલ બનાવી હતી. એડિડાસની તાજેતરની એડવર્ટાઈઝમેન્ટમાં ૧૯૭૨ના ઓલિમ્પિકની વાત કરવામાં આવી છે. આ ઓલિમ્પિકમાં પેલેસ્ટાઈનના હુમલાખોરોએ ઈઝરાયેલ-જર્મનીના ખેલાડીઓની હત્યા કરી હતી. હાલ પેલેસ્ટાઈન-ઈઝરાયેલ સંઘર્ષ ચરમસીમાએ છે અને બેલ્લા હદિદ પોતાને ચુસ્ત પેલેસ્ટિનિયન ગણાવે છે.
પેલેસ્ટાઈનનું સમર્થન કરવા બદલ મોડેલિંગનું કામ ઘટી જાય તો પણ હદિદને પરવા નથી. આ એડ બાદ તેણે પોતાને મોડેલ બનાવનારી કંપની સામે જ કેસ માંડવાની તૈયારી કરી છે.
એથલેટિક વેર બનાવતી કંપનીની ૫૨મી એનિવર્સરી નિમિત્તે ૧૯૭૨માં મ્યુનિચ ખાતે યોજાયેલા ઓલિમ્પિકને યાદ કરાયો હતો. આ એડ થકી કંપનીએ ૧૯૭૦ના ક્લાસિક કલેક્શનમાંથી સ્નીકરની રેન્જ રીવાઈવ કરી હતી. અગાઉ એડિડાસની એડ માટે બેલ્લા હદિદને ફાઈનલ કરવામાં આવી હતી. જો કે હદિદે પેલેસ્ટાઈન તરફી વલણ રાખતાં તેને સાઈડલાઈન કરાઈ હતી. હદિદને જાહેરખબર ગુમાવ્યાનું દુ:ખ તો હતું જ, પરંતુ તેને દૂર કરીને એડિડાસે મ્યુનિચ ઓલિમ્પિકની વાત કરી હતી. અહીંયા પેલેસ્ટાઈનના હુમલાખરોએ સામૂહિક નરસંહાર કર્યો હતો. ભૂતકાળના આ હુમલાની વાત તાજી થાય તો તેની અસર ઈઝરાયલ-પેલેસ્ટાઈન યુદ્ધ પર પડી શકે છે તેવું હદિદ માને છે. હદિદનો જન્મ ૧૯૯૬માં અમેરિકાના વોશિંગ્ટન ડીસીમાં થયો હતો. જો કે તેના પિતા પેલેસ્ટાઈનના હતા. પોતાના મન અને મગજમાં પેલેસ્ટીન હોવાનું હદિદ જાહેર કરી ચૂકી છે.
અમેરિકામાં રહેતા યહૂદી સમાજે હદિદનો વિરોધ કર્યો છે અને તેને એન્ટિ-ઈઝરાયેલ મોડેલ ગણાવી છે. એડિડાસે તાજેતરની એડમાં હદિદને પડતી મૂકી છે ત્યારે પોતાને મોડેલ બનાવનારી કંપની સામે જ કેસ માંડવાની તૈયારી તેણે આદરી છે. વિવાદ વધવાની આશંકાના પગલે એડિડાસે પણ જાહેરખબર પાછી ખેંચી લીધી છે અને નવી જાહેરખબર સાથે કમબેક કરવાની તૈયારી શરૂ કરી છે. દરમિયાન બેલ્લા હદિદે એડિડાસ સામે બદનક્ષીના કેસ સહિતની જોગવાઈઓ હેઠળ કાનૂની પગલાં લેવા તૈયારી આદરી હોવાનું કહેવાય છે.