મુંબઈ,બોલીવુડ સુપરસ્ટાર સંજય દત્ત ફિલ્મ ઈન્ડસ્ટ્રીમાં પોતાની દમદાર એક્ટિંગ માટે જાણીતા છે. સંજય દત્તને લઈને એક મોટી જાણકારી સામે આવી રહી છે. સંજય દત્ત એક ફિલ્મના શૂટિંગ દરમિયાન ઈજાગ્રસ્ત થઈ ગયા છે. સંજય દત્ત અત્યારે બેંગ્લુરુની આસપાસના વિસ્તારોમાં પોતાની આગામી કન્નડ ફિલ્મ કેડી: ધ ડેવિલ ના શૂટિંગમાં વ્યસ્ત છે. આ ફિલ્મમાં એક બોમ્બ વિસ્ફોટ સિક્વેન્સનું શૂટિંગ ચાલી રહ્યુ હતુ. આ બોમ્બ બ્લાસ્ટનું શૂટિંગ કરવા દરમિયાન સંજય દત્ત ઈજાગ્રસ્ત થઈ ગયા છે.
સૂત્રો અનુસાર સંજય દત્તની કોણી, હાથ અને ચહેરા પર ખૂબ ઈજા પહોંચી છે. આ ઘટના બાદ ફિલ્મનું શૂટિંગ રોકી દેવાયુ છે. સંજય દત્ત ફાઈટ માસ્ટર ડોક્ટર રવિ વર્માની ફિલ્મ કેડી: ધ ડેવિલ માટે ફાઈટ કંપોઝ કરી રહ્યા હતા. આ દરમિયાન તેઓ ઘટનાનો શિકાર થયા. આ સમાચાર બાદ ચાહકો ખૂબ ચિંતામાં મૂકાઈ ગયા છે. દરેક તેમના જલ્દી સાજા થવાની પ્રાર્થના કરી રહ્યા છે.
સંજય દત્ત કેજીએફ ચેપ્ટર ૧ અને કેજીએફ ચેપ્ટર ૨ બાદ એકવાર ફરીથી ખલનાયકની ભૂમિકામાં જોવા મળશે. સંજય દત્ત એક્શન હીરો ધ્રુવ સરજા સામે કન્નડ ફિલ્મ ’કેડી: ધ ડેવિલ’ માં એક ખલનાયકની ભૂમિકામાં જોવા મળશે. તાજેતરમાં જ ધ્રુવ સરજાની ફિલ્મ ’માટન’નું ટીઝર રિલીઝ થયુ છે જે ખૂબ પસંદ કરવામાં આવ્યુ હતુ.