મુંબઇ, તાજેતરમાં જ ૬૦ વર્ષીય અભિનેતા આશિષ વિદ્યાર્થીના બીજા લગ્નની તસવીરો સોશિયલ મીડિયા પર વાયરલ થઈ હતી અને એક તરફ આ તસવીરો જોઈને ચાહકો આશ્ર્ચર્યચક્તિ થઈ ગયા હતા તો બીજી તરફ તેઓ અભિનેતાને અભિનંદન આપવા લાગ્યા હતા. આશિષે રૂપાલી બરુઆ સાથે બીજા લગ્ન કર્યા, ત્યારપછી અભિનેતાની પહેલી પત્ની રાજોશી બરુઆની કેટલીક ઈન્સ્ટા પોસ્ટ સોશિયલ મીડિયા પર ચર્ચામાં આવી છે.
રાજોશીએ લગભગ ૪ કલાકની અંદર બે ઇન્સ્ટા સ્ટોરી શેર કરી. રાજોશીએ તેમની પ્રથમ સ્ટોરીમાં લખ્યું હતું કે, ‘યોગ્ય વ્યક્તિ તમને તે પ્રશ્ર્ન પૂછશે નહીં કે તમે તેમના માટે શું કહેવા માગો છો. તે આ ત્યારે જ કરશે જ્યારે તેને ખબર હશે કે તે તમને નુક્સાન પહોંચાડશે. આ યાદ રાખો.’ જ્યારે બીજી વાર્તામાં તેણે લખ્યું છે કે, ‘કદાચ તમારા મગજમાંથી કદાચ વધારે વિચાર અને શંકા નીકળી ગઈ છે. સ્પષ્ટતા કદાચ મૂંઝવણને બદલે છે. શાંતિ અને ધૈર્ય તમારા જીવનને ભરી દે. તમે લાંબા સમયથી મજબૂત છો અને હવે આશીર્વાદ લેવાનો સમય છે. કારણ કે તમે તેને લાયક છો.
આ સિવાય રાજોશીએ સોશિયલ મીડિયા પર પોતાનો એક હસતો ફોટો પણ શેર કર્યો હતો, જેની સાથે તેણે કેપ્શનમાં લખ્યું હતું કે, “ઝિંદગી કે પાજલ મેં ઉલ્ઝે નહીં, યેહી લાઈફ હૈ.” જણાવી દઈએ કે આશિષના બીજા લગ્ન પછી લોકો તેની પહેલી પત્ની વિશે વધુને વધુ જાણવાનો પ્રયાસ કરી રહ્યા છે. ઉલ્લેખનીય છે કે, આશિષ અને રાજોશીને એક પુત્ર છે, જેની ઉંમર ૨૩ વર્ષ છે. આશિષ અને રાજોશીના પુત્રનું નામ વિદ્યાર્થિ છે.
આશિષ વિદ્યાર્થીએ ૨૫ મેના રોજ તેના નજીકના મિત્રો અને પરિવારજનોની હાજરીમાં કોર્ટ મેરેજ કર્યા હતા. અભિનેતાએ આસામની રહેવાસી રૂપાલી બરુઆને પોતાના જીવનસાથી તરીકે પસંદ કરી હતી. બંનેએ કોલકાતામાં સાદગી સાથે જીવનભર એકબીજાની સાથે રહેવાની પ્રતિજ્ઞા લીધી હતી. અહેવાલો અનુસાર, રૂપાલી બરુઆ ફેશન ઉદ્યોગ સાથે સંકળાયેલી છે અને કોલકાતામાં એક ફેશન સ્ટોર પણ ધરાવે છે. ગઈકાલે બન્નેના લગ્નની માહિતી સામે આવી હતી, જે બાદ અભિનેતાના લગ્નની તસવીરો સોશિયલ મીડિયા પર વાયરલ થઈ રહી છે.