- લગભગ ૩૪,૧૦૦ લોકો પૂરથી પ્રભાવિત થયા.
ગુવાહાટી, આસામમાં મંગળવારે રાતોરાત વરસાદ પડ્યો હતો, જેના પગલે પૂરની સ્થિતિ વિકટ બની હતી. રાજ્યના નવ જિલ્લાઓમાં ૩૪,૦૦૦ થી વધુ લોકો પૂરની ઝપેટમાં છે. બીજી તરફ હવામાન વિભાગની આગાહીએ લોકોની ચિંતા વધારી દીધી છે. હવામાન વિભાગે આગામી થોડા દિવસોમાં રાજ્યના ઉપરના વિસ્તારોમાં ભારેથી અતિભારે વરસાદની આગાહી કરી છે, જેના કારણે બ્રહ્મપુત્રા અને તેની સહાયક નદીઓના જળસ્તરમાં વધારો થઈ શકે છે.
આસામ સ્ટેટ ડિઝાસ્ટર મેનેજમેન્ટ ઓથોરિટીએ જણાવ્યું હતું કે ભૂટાન સરકારે હવામાન એડવાઇઝરી જારી કરી છે કે દેશના અલગ-અલગ વિસ્તારોમાં આગામી બે-ત્રણ દિવસમાં હળવાથી મધ્યમ વરસાદ સાથે વાદળછાયું રહેવાની શક્યતા છે. બ્રહ્મપુત્રા અને તેની ઉપનદીઓમાં પાણીનું સ્તર વધી રહ્યું છે. ભૂટાન અને આસામના બંને ઉપલા કેચમેન્ટ વિસ્તારોમાં અવિરત વરસાદ તેમજ પડોશી દેશના કુરિચુ ડેમમાંથી પાણી છોડવાને કારણે રાજ્યના પશ્ર્ચિમ ભાગમાં પૂરની સ્થિતિ વિકટ બની છે.
હવામાન વિભાગે પણ ’રેડ એલર્ટ’ જારી કર્યું છે અને આગામી થોડા દિવસોમાં આસામના કેટલાક જિલ્લાઓમાં ’ખૂબ ભારે’થી ’અત્યંત ભારે’ વરસાદની આગાહી કરી છે. ગુવાહાટીમાં આઇએમડીના પ્રાદેશિક હવામાન કેન્દ્રે ૨૪ કલાક માટે ’રેડ એલર્ટ’ જારી કરી છે, ત્યારબાદ બુધવાર માટે ’ઓરેન્જ એલર્ટ’ અને ગુરુવાર માટે ’યલો એલર્ટ’ જારી કરી છે. ’રેડ એલર્ટ’નો અર્થ થાય છે તાત્કાલિક પગલાં લેવા, જ્યારે ’ઓરેન્જ એલર્ટ’નો અર્થ એક્શન માટે તૈયાર રહેવું અને ’યલો એલર્ટ’નો અર્થ થાય છે સતર્ક અને જાગૃત રહેવું.
બક્સા, બરપેટા, દરરંગ, ડિબ્રુગઢ, કોકરાઝાર, લખીમપુર, નલબારી, સોનિતપુર અને ઉદલગુરી જિલ્લામાં પૂરને કારણે લગભગ ૩૪,૧૦૦ લોકો પ્રભાવિત થયા છે. લખીમપુર સૌથી વધુ પ્રભાવિત થયું છે, જ્યાં પૂરથી ૨૨,૦૦૦ થી વધુ લોકો પ્રભાવિત થયા છે. આ પછી, ડિબ્રુગઢમાં લગભગ ૩,૯૦૦ અને કોકરાઝારમાં ૨,૭૦૦ થી વધુ લોકો પ્રભાવિત થયા છે. વહીવટીતંત્ર કોકરાઝારમાં રાહત શિબિર ચલાવી રહ્યું છે જ્યાં ૫૬ લોકોએ આશ્રય લીધો છે અને તે ચાર જિલ્લામાં ૨૪ રાહત વિતરણ કેન્દ્રો પણ ચલાવી રહ્યું છે. આસામમાં હાલમાં ૫૨૩ ગામો ડૂબી ગયા છે અને ૫,૮૪૨.૭૮ હેક્ટર ખેતીની જમીનને નુક્સાન થયું છે.
એએસડીએમએએ જણાવ્યું હતું કે બરપેટા, સોનિતપુર, બોંગાઈગાંવ, ધુબરી, ડિબ્રુગઢ, ગોલાઘાટ, કામરૂપ, મોરીગાંવ, નલબારી, શિવસાગર અને ઉદલગુરીમાં મોટા પાયે જમીન ધોવાણ જોવા મળ્યું છે. કચર, દિમા હસાઓ અને કરીમગંજમાં ભારે વરસાદને કારણે ભૂસ્ખલનની ઘટનાઓ નોંધાઈ છે. ઉદલગુરી, સોનિતપુર, દરરંગ, બોંગાઈગાંવ, ચિરાંગ, ધુબરી, ગોલપારા, કામરૂપ, કરીમગંજ, કોકરાઝાર, નાગાંવ, નલબારી અને બરપેટામાં પૂરના પાણીથી પાળા, રસ્તા, પુલ અને અન્ય માળખાગત સુવિધાઓને નુક્સાન થયું છે. દારાંગ, જોરહાટ, કામરૂપ મેટ્રોપોલિટન, કોકરાઝાર અને નલબારી જિલ્લાઓમાં ઘણી જગ્યાઓ સાથે શહેરી વિસ્તારો ડૂબી ગયા હતા. જો કે, હાલમાં કોઈ નદી ખતરાના નિશાનથી ઉપર વહી રહી નથી.