નવીદિલ્હી, 2019ની લોકસભા ચૂંટણીની સરખામણીમાં 2024ની લોકસભા ચૂંટણીમાં વધુ બેઠકો પર લડશે. લોકસભા ચૂંટણી માટે આચારસંહિતા લાગુ થાય તે પહેલા ભાજપ જાન્યુઆરીના અંતિમ સપ્તાહ અથવા ફેબ્રુઆરીના પ્રથમ સપ્તાહમાં તેના ઉમેદવારોના નામની જાહેરાત કરી શકે છે. ભાજપ પહેલી યાદીમાં વડાપ્રધાન નરેન્દ્ર મોદી, રાજનાથ સિંહ અને ગૃહમંત્રી અમિત શાહના નામની જાહેરાત કરશે.
છેલ્લી 2019ની લોકસભા ચૂંટણીમાં પણ ભાજપે પહેલી યાદીમાં પીએમ મોદી, અમિત શાહ અને રાજનાથ સિંહની સીટોના નામ જાહેર કર્યા હતા. ભાજપની પ્રથમ યાદીમાં 164 બેઠકોમાંથી મોટાભાગની બેઠક પર ઉમેદવારોના નામ પણ હશે, જે બેઠકો ભાજપ આજ સુધી ક્યારેય જીતી શકી નથી અથવા 2019માં જીતનું માર્જિન ઘણું ઓછું હતું. ભાજપ છેલ્લા બે વર્ષથી આવી બેઠકો પર સતત મહેનત કરી રહ્યું છે. છેલ્લી લોકસભા ચૂંટણીમાં ભાજપે 543માંથી 436 બેઠકો પર ચૂંટણી લડી હતી અને 303 બેઠકો જીતી હતી અને 133 બેઠકો પર ચૂંટણી હારી હતી. 31 અન્ય બેઠકો પણ છે, જ્યાં પાર્ટી નબળી છે. આ 164 બેઠકોનું ક્લસ્ટર બનાવી તેની જવાબદારી ગૃહ મંત્રી અમિત શાહ સહિત કેન્દ્રીય પ્રધાનો અને વરિષ્ઠ નેતાઓને સોંપવામાં આવી હતી.
ભાજપે આ સીટોને સી અને ડી કેટેગરીમાં વહેંચી છે અને 80-80 સીટોની બે કેટેગરી કરી છે. આ બેઠકોની જવાબદારી 45 મંત્રીઓને આપવામાં આવી છે. દરેક મંત્રી બેથી ત્રણ બેઠકો માટે જવાબદાર છે. આ વખતે ભાજપ ગત લોકસભા ચૂંટણી કરતાં વધુ બેઠકો પર ચૂંટણી લડી શકે છે, કારણ કે આ વખતે તેના સહયોગીઓની સંખ્યા ગત વખતની સરખામણીએ ઓછી થઈ છે.
2019માં ભાજપે પંજાબમાં શિરોમણિ અકાલી દળ, બિહારમાં JDU, મહારાષ્ટ્રમાં શિવસેના, તમિલનાડુમાં AIADMK અને રાજસ્થાનમાં હનુમાન બૈનીવાલની પાર્ટી RLP સાથે ગઠબંધન કર્યું હતું. ભાજપે પંજાબની 13માંથી 3 બેઠકો, મહારાષ્ટ્રની 48માંથી 25 અને બિહારની 40માંથી 17 બેઠકો પર ચૂંટણી લડી હતી. જ્યારે તમિલનાડુમાં AIADMKએ ભાજપને પાંચ બેઠકો આપી હતી. આ વખતે ભાજપ આ રાજ્યોમાં વધુ બેઠકો પર ચૂંટણી લડશે.
ભાજપે ઉત્તર પ્રદેશમાં આવી 14 બેઠકોની યાદી તૈયાર કરી છે જ્યાં તે પોતાને નબળી માને છે. પાર્ટીએ 2019માં ઉત્તર પ્રદેશમાં 16 બેઠકો ગુમાવી હતી, પરંતુ પેટાચૂંટણીમાં બે બેઠકો જીતી હતી. રાયબરેલી, મૈનપુરી, બિજનૌર, સહારનપુર, સંભાલ, મુરાદાબાદ, ગાઝીપુર, જૌનપુર, રામપુર, આઝમગઢ, નગીના, અમરોહા, આંબેડકર નગર, શ્રાવસ્તી, ઘોસી, લાલગંજ સીટ માટે ઉમેદવારોના નામ પ્રથમ યાદીમાં હશે. તેમાંથી કેટલીક બેઠક સપાનો ગઢ માનવામાં આવે છે અને આ સંદર્ભે ભાજપ તેને ફોલ્ડમાં લાવવાનો પ્રયાસ કરી રહી છે.
પ્રથમ યાદીમાં બિહારની નવાદા, સુપૌલ, કિશનગંજ, કટિહાર, મુંગેર, ગયા, સુપૌલ સીટો માટે ઉમેદવારો જાહેર કરવામાં આવશે. મધ્યપ્રદેશની છિંદવાડા બેઠક ખૂબ જ નબળી શ્રેણીમાં આવે છે. આ પૂર્વ સીએમ કમલનાથનો ગઢ છે. અહીં વિધાનસભા ચૂંટણીમાં ભાજપને ફરી એક ઝટકો લાગ્યો છે. તેની જવાબદારી ગિરિરાજ સિંહને આપવામાં આવી છે. કેરળમાં થ્રિસુર, થટનમિટ્ટા અને તિરુવનંતપુરમ બેઠકો છે. ભાજપ ત્રિશૂરથી સુરેશ ગોપીને ટિકિટ આપી શકે છે.
મહારાષ્ટ્રમાં બારામતી, બુલઢાણા અને ઔરંગાબાદ, પંજાબમાં અમૃતસર, આનંદપુર સાહિબ, ભટિંડા અને ગુરદાસપુર બેઠકોનો સમાવેશ થાય છે. ગઠબંધનમાં ચર્ચાને કારણે પંજાબ, મહારાષ્ટ્ર અને બિહારની કેટલીક સીટો પણ બદલાઈ શકે છે. આ વખતે ભાજપ 70 વર્ષથી વધુ ઉંમરના અને ત્રણ વખતથી વધુ વખત જીતેલા લોકસભાના સાંસદોને ટિકિટ નહીં આપવાનું આયોજન કરી રહ્યું છે. તેનો પ્રયાસ નવા ચહેરા પર દાવ લગાવવાનો છે. ઉલ્લેખનીય છે કે, વડાપ્રધાન નરેન્દ્ર મોદીએ 2024ની લોકસભા ચૂંટણીમાં 50 ટકાથી વધુ વોટ મેળવવાનું લક્ષ્ય રાખ્યું છે.