દે.બારીઆ, દે.બારીઆ તાલુકામાં પાનમ અને ઉજજવળ એમ બે નદીઓમાં સફેદ રેતીનો વિપુલ પ્રમાણમાં જથ્થો આવ્યો છે. આ નદી કાંઠાના અમુક ગામડા જેવા કે, બૈણા, જુના બારીયા, ઉંચવાણ, ચેનપુર, રામા, વિરોલ, રાતડીયા, લવારીયામાં કયાંક કયાંક રેતીની કાયદેસર લીઝની મંજુરી સરકારના ખાણ ખનીજ વિભાગ દ્વારા આપવામાં આવેલ છે. જયારે અમુક જગ્યાએ કોઈપણ જાતની પરમીશન વગર રેતી ખનન કરવાની ગેરકાયદેસર પ્રવૃત્તિઓ ધમધમી રહી છે. જે જગ્યાએ રેતીની લીઝ આવેલ છે. ત્યાં ધણીવાર રેતી અન્ય જગ્યાએથી ટ્રકમાં ભરી લાવી અને રોયલ્ટી પાસ અપાતી હોવાની જાણકારી મળી છે. જયારે ધણીવાર કોઈપણ રોયલ્ટી પાસ વગર ઓવરલોડ રેતી ભરેલી ટ્રકો અન્ય રાજયમાં પણ પહોંચતી હોય છે. રોયલ્ટી પાસ નહિ હોવાના કારણે સરકારની તિજોરીમાં મોટી ખોટ રેતી માફિયાઓ કરી રહ્યા છે. દે.બારીઆ તાલુકામાં ખાણ ખનીજ દાહોદની ગાડી આવવાની હોય ત્યારે ગેરકાયદેસર રેતી વહન કરતા ટ્રક ચાલકો રેતી ભરેલી ગાડીઓ કયાંક છુપાવી દેતા હોય છે. કેમ કે તેમને કયાંક કઈંક રીતે માહિતી મળી જતી હશે.માટે તેઓ ધણીવાર રેતી ભરવા નદીમાં ગયા હોય ત્યાંથી પણ બહાર નીકળી જતા હોય છે. સંલગ્ન તંત્રના અધિકારીઓ દ્વારા ગેરકાયદેસર રેતી ભરેલી ટ્રકો પકડાઈ ત્યારે તેમના મોબાઈલ ફોનની ચકાસણી કરવી જરૂરી છે. કદાચ કોઈ ગ્રુપ મારફતે જાણકારી મળતી હોય તેવુ માણવામાં આવી રહ્યુ છે.