નવીદિલ્હી, દિલ્હી લિકર પોલિસી કેસ: દિલ્હી લિકર પોલિસી કેસમાં સંજય સિંહને કોઈ રાહત મળતી હોય તેવું લાગતું નથી. સુપ્રીમ કોર્ટે આમ આદમી પાર્ટીના સાંસદની ન્યાયિક કસ્ટડી ફરી લંબાવી છે. કોર્ટે સંજય સિંહની જ્યુડિશિયલ કસ્ટડી ૨૧ ડિસેમ્બર સુધી લંબાવી છે. વાસ્તવમાં આમ આદમી પાર્ટીના સાંસદ સંજય સિંહે સુપ્રીમ કોર્ટમાં જામીન અરજી દાખલ કરીને કહ્યું હતું કે દિલ્હી લિકર પોલિસી કેસમાં તેમની ધરપકડ ખોટી છે.
કોર્ટે ૨૦ નવેમ્બરે નોટિસ જારી કરી હતી અને કેન્દ્ર અને ED ને સિંહ દ્વારા દાખલ કરવામાં આવેલી અરજી પર જવાબ આપવા કહ્યું હતું. સોમવારે (૧૧ ડિસેમ્બર) અરજી પર સુનાવણી કરતી વખતે કોર્ટે આમ આદમી પાર્ટીના નેતાને કોઈ વચગાળાની રાહત આપી ન હતી.
સુપ્રીમ કોર્ટે આપ નેતાને નીચલી કોર્ટમાં જામીન માટે પ્રયાસ કરવા કહ્યું છે. જોકે, સુપ્રીમ કોર્ટે જામીન અરજીમાં ઉઠાવવામાં આવેલા કાયદાકીય પ્રશ્ર્નોની સુનાવણી ૫ ફેબ્રુઆરીએ કરવાનું કહ્યું છે.કેન્દ્રીય તપાસ એજન્સી ED પહેલાથી જ રાઉઝ એવન્યુ કોર્ટમાં આમ આદમી પાર્ટીના સાંસદ વિરુદ્ધ ૬૦ પાનાની પૂરક ચાર્જશીટ દાખલ કરી ચૂકી છે. તેના પર કાવતરું ઘડવામાં, મની લોન્ડરિંગમાં સામેલ હોવાનો અને દિલ્હી એક્સાઇઝ પોલિસી કેસમાં આરોપીઓને મદદ કરવાનો આરોપ હતો.
ઈડીએ ૪ ઓક્ટોબરે રાજ્યસભા સાંસદ સિંહની ઉત્તર એવેન્યુ વિસ્તારમાં તેમના નિવાસસ્થાને સર્ચ કર્યા બાદ ધરપકડ કરી હતી. ધરપકડ પહેલા EDએ સંજય સિંહની કેટલાંક કલાકો સુધી પૂછપરછ કરી હતી. તે ઓક્ટોબરથી તિહાર જેલમાં બંધ છે. એમપી સિંહની ધરપકડ પહેલા દિલ્હીના ડેપ્યુટી સીએમ મનીષ સિસોદિયાની પણ ધરપકડ કરવામાં આવી હતી.