દાહોદ, વિકસિત ભારત સંકલ્પ યાત્રા દાહોદ જીલ્લાના તમામ તાલુકાઓના ગ્રામ્ય વિસ્તારોમાં પરિભ્રમણ કરી રહી છે. આ યાત્રાનો રથ ફતેપુરા તાલુકાના હિંદોલીયા ગામે પહોંચતા ધારાસભ્ય રમેશભાઈ કટારા અને ગ્રામજનો દ્વારા ઉમંગભેર સ્વાગત કરવામાં આવ્યું હતું.
આ પ્રસંગે ધારાસભ્ય રમેશભાઈ કટારા એ વિકસિત ભારત સંકલ્પ યાત્રાનો હેતુ કાર્યક્રમમાં ઉપસ્થિત ગ્રામજનો સમક્ષ સ્પષ્ટ કર્યો હતો. ગામમાં હજુ પણ કોઈ નાગરિક સરકારની યોજનાઓથી વંચિત રહી ગયા હોય તો તેને પણ યોજનાથી લાભાન્વિત કરવા ગામના અગ્રણીઓને આગ્રહ કર્યો હતો. આજે આપણા આંગણે આવી પહોંચેલા વિકાસ રથને આવકારી સરકારી યોજનાના વિવિધ સ્ટોલોની મુલાકાત લઇ મળવા પાત્ર લાભ લેવા ગ્રામજનોને અનુરોધ કર્યો હતો.
કાર્યક્રમમાં મહાનુભાવોના વરદ હસ્તે લાભાર્થીઓને સરકારની વિવિધ કલ્યાણકારી યોજનાઓના લાભોનું વિતરણ પણ કરવામાં આવ્યું હતું. ઉપરાંત વિવિધ સાંસ્કૃતિક કાર્યક્રમો યોજાયા હતા.
આ કાર્યક્રમમાં તાલુકા પંચાયતના સભ્યો, જીલ્લા પંચાયતના સભ્યો, સરપંચો સહિત વિવિધ વિભાગના અધિકારીઓ કર્મચારીઓ સહિત મોટી સંખ્યામાં ગ્રામજનો ઉપસ્થિત રહ્યા હતા.