મુંબઇ, મરાઠા આરક્ષણને લઈને આંદોલનકારીઓમાં ગુસ્સો વધી રહ્યો છે. કેટલાક વિરોધીઓ બસો પર પ્રદર્શિત સીએમ એકનાથ શિંદે અને ડેપ્યુટી સીએમ દેવેન્દ્ર ફડણવીસના પોસ્ટરને કાળા કરતા જોવા મળ્યા હતા. આ વીડિયો થાણેના ભિવંડીનો હોવાનું કહેવાય છે.મહારાષ્ટ્રમાં મરાઠા સમુદાય માટે સરકારી નોકરીઓ અને શિક્ષણમાં અનામતની માંગ ઘણી જૂની છે. ૧૯૯૭ માં, મરાઠા સંઘ અને મરાઠા સેવા સંઘે સરકારી નોકરીઓ અને શૈક્ષણિક સંસ્થાઓમાં આરક્ષણ માટે પ્રથમ મોટું મરાઠા આંદોલન શરૂ કર્યું. વિરોધીઓએ વારંવાર કહ્યું છે કે મરાઠાઓ ઉચ્ચ જાતિના ન હતા પરંતુ તેઓ મૂળ કુણબી અથવા કૃષિ સમુદાયના હતા.
વર્તમાન પરિસ્થિતિની વાત કરીએ તો મહારાષ્ટ્રની કુલ વસ્તીના લગભગ ૩૧ ટકા મરાઠા સમુદાય છે. તે એક મુખ્ય જાતિ સમૂહ છે પરંતુ હજુ પણ એકરૂપ નથી. તેમાં ભૂતપૂર્વ સામંત વર્ગ અને શાસકો તેમજ સૌથી વંચિત ખેડૂતોનો સમાવેશ થાય છે. રાજ્યમાં કૃષિ સંકટ, નોકરીની અછત અને સરકારોના અધૂરા વચનોને કારણે સમાજે વારંવાર આંદોલન કર્યું છે.૨૦૧૮ માં, મહારાષ્ટ્ર વિધાનસભામાંથી મરાઠા સમુદાય માટે શિક્ષણ અને સરકારી નોકરીઓમાં ૧૬% અનામતની દરખાસ્ત કરતું બિલ પસાર કરવામાં આવ્યું હતું. બિલમાં સરકારે મરાઠા સમુદાયને સામાજિક અને શૈક્ષણિક રીતે પછાત વર્ગ તરીકે જાહેર કર્યો છે.
વિધાનસભામાં પાસ થયા બાદ મરાઠા આરક્ષણનો મામલો કોર્ટમાં ગયો. જૂન ૨૦૧૯ માં, બોમ્બે હાઈકોર્ટે મરાઠા આરક્ષણની બંધારણીયતાને સમર્થન આપ્યું હતું, પરંતુ સરકારને રાજ્ય પછાત વર્ગ આયોગની ભલામણ મુજબ તેને ૧૬% થી ઘટાડીને ૧૨ થી ૧૩% કરવા જણાવ્યું હતું.આ અનામતને મોટો ફટકો ત્યારે લાગ્યો જ્યારે મે ૨૦૨૧માં સુપ્રીમ કોર્ટે મરાઠા આરક્ષણને ગેરબંધારણીય જાહેર કરીને કાયદો રદ કર્યો. કોર્ટે કહ્યું કે મરાઠા આરક્ષણ પર ૫૦ ટકાની મર્યાદાનો ભંગ થયો છે.
મહારાષ્ટ્રના પોલીસ મહાનિર્દેશક (ડીજીપી) રજનીશ સેઠે બુધવારે જણાવ્યું હતું કે મરાઠા ક્વોટા આંદોલન દરમિયાન થયેલી હિંસાના સંબંધમાં રાજ્ય પોલીસે અત્યાર સુધીમાં ૧૪૧ કેસ નોંયા છે અને ૧૬૮ લોકોની ધરપકડ કરી છે. બીડ જિલ્લામાં થયેલી હિંસા અંગે તેમણે કહ્યું હતું કે ૨૪ થી ૩૧ ઓક્ટોબર વચ્ચે ભારતીય દંડ સંહિતાની કલમ ૩૦૭ (હત્યાનો પ્રયાસ) હેઠળ સાત ગુનાઓ સહિત ૨૦ કેસ નોંધાયા છે.