ગાંધીનગર, ગુજરાતના તત્કાલીન મુખ્યમંત્રી અને હાલના વડાપ્રધાન નરેન્દ્ર મોદીના દૂરંદેશી નેતૃત્વ હેઠળ વર્ષ ૨૦૦૩માં શરૂ થયેલી વાઇબ્રન્ટ ગુજરાત ગ્લોબલ સમિટને આજે ૨૦ વર્ષ પૂર્ણ થયા છે અને આ ૨૦ વર્ષ દરમિયાન એક લાખથી પણ વધુ એમઓયુ કરવામાં આવ્યા છે, તેમ પ્રવક્તા મંત્રી ૠષિકેશભાઈ પટેલે જણાવ્યું હતું.ગાંધીનગર ખાતે મુખ્યમંત્રી ભૂપેન્દ્ર પટેલની અધ્યક્ષતામાં રાજ્ય મંત્રી મંડળની બેઠક મળી હતી.
આ બેઠકમાં લેવાયેલા નિર્ણયો અંગે માહિતી આપતા પ્રવક્તા મંત્રીશ્રીએ કહ્યું હતું કે, વાઇબ્રન્ટ ગુજરાત ગ્લોબલ સમિટ અંતર્ગત અત્યારસુધીમાં થયેલા એમઓયુના ૭૧ ટકા અને વર્ષ ૨૦૧૯માં યોજાયેલી વાઇબ્રન્ટ સમિટમાં થયેલા એમઓયુના ૮૧ ટકા ગ્રાઉન્ડ લેવલે સફળ રહ્યા છે. તેમણે ઉમેર્યું હતું કે, આ વર્ષે ગુજરાતમાં યોજાનાર ‘વાઇબ્રન્ટ ગુજરાત ગ્લોબલ સમિટ-૨૦૨૪‘ની ભવ્ય સફળતા માટે રાજ્ય સરકાર દ્વારા પૂરજોશમાં તૈયારીઓ ચાલી રહી છે. જે અંતર્ગત દર અઠવાડિયે મુખ્યમંત્રી ભૂપેન્દ્ર પટેલની ઉપસ્થિતમાં કરવામાં આવી રહ્યા છે. ૧૦ મી વાઇબ્રન્ટ ગુજરાત ગ્લોબલ સમિટના પગલે અત્યારસુધીમાં ગુજરાતમાં કુલ ૧૮,૪૮૫ કરોડના એમઓયુ સંપન્ન થયા છે. જે રાજ્યમાં ૬૫,૦૩૨થી વધુ રોજગારીના અવસર પ્રદાન કરશે.આ ઉપરાંત ચાલુ વર્ષના વાઇબ્રન્ટમાં એમઓયુ પલ્સ પદ્ધતિ અનુસરવામાં આવી છે. જેના પરિણામે એમઓયુ સફળતાનો રેશિયો પણ વધીને ૯૦ ટકા જેટલો રહેવાનું અનુમાન છે. જેમાં જમીનની ઉપલબ્ધતા, ફાઇનાન્સીયલ ક્લોઝર, ટેકનો કોમર્શીયલ અને ફીઝીબીલીટી જેવા પરિબળોના પૂર્ણત: અભ્યાસ પર ભાર મૂકવામાં આવ્યો છે,તેમ મંત્રીશ્રીએ ઉમેર્યું હતું.
વધુ માહિતી આપતા મંત્રી પટેલે કહ્યું હતું કે, ૧૦મી વાઇબ્રન્ટના ઉપલક્ષ્યમાં ;વાઈબ્રન્ટ ગુજરાત-વાઈબ્રન્ટ ડિસ્ટ્રિક્ટ કાર્યક્રમ પણ હાથ ધરવામાં આવ્યો છે.એમઓયુને રાજ્ય કક્ષા સુધી જ સીમિત ન રાખતા જિલ્લા સ્તરે પણ રોકાણકારોને સ્મોલ એન્ડ મીડિયમ ઇન્ડ્રસ્ટ્રીઝ, નાના રોકાણકારોને સહભાગી બનાવવા અને તેમની સ્કીલને પ્રોત્સાહન આપવા આ કાર્યક્રમ હાથ ધરવામાં આવી રહ્યા છે અને આ કાર્યક્રમને વ્યાપક પ્રતિસાદ મળી રહ્યો છે. રાજ્યમાં અત્યારસુધીમાં કુલ ૨૭ જિલ્લાઓમાં આ કાર્યક્રમ આયોજિત થઈ ચૂક્યા છે, જેમાં ૨૨ હજારથી વધુ લોકોએ ભાગ લીધો છે.
આ કાર્યક્રમો દરમિયાન રૂ. ૩૯,૫૦૩ કરોડના એમઓયુ કરવામાં આવ્યા છે, જેના થકી રાજ્યમાં ૧,૫૦,૮૧૫ થી વધુ રોજગારીની તકો ઉભી થશે. ગત તા.૧૭ ઓક્ટોબરના રોજ અમદાવાદ ખાતે યોજાયેલા વાઈબ્રન્ટ ગુજરાત-વાઈબ્રન્ટ અમદાવાદ કાર્યક્રમ દરમ્યાન રૂ. ૧૨,૭૫૨ કરોડના ૪૮૪ એમઓયુ થયા છે, જે આપણા સૌ માટે ગૌરવની વાત છે. મંત્રીશ્રીએ ઉમેર્યું હતું કે, વાઇબ્રન્ટ ગુજરાત ગ્લોબ સમીટ એ માત્ર બે કે ત્રણ દિવસની ઇવેન્ટ હોઇ શકે,પરંતુ તેના સંદર્ભે થતા એમઓયુ રોકાણ, ઉદ્યોગો સ્થાપવાની મંજૂરી સહિતની પ્રક્રિયા અવિરત ચાલતી જ રહે છે. આ વર્ષે વાઇબ્રન્ટ સમિટ સંદર્ભે ગુજરાત રીન્યુએબલ એનર્જી પોલીસી, સેમીકન્ડકટર પોલીસી, ટેક્સટાઇલ અને આઇ.ટી. પોલીસી, ઇલેક્ટ્રીક વ્હીકલ પોલીસી લોન્ચ કરવામાં આવી છે.