નવીદિલ્હી, ટીમ ઇન્ડિયા અત્યાર સુધી વર્લ્ડ કપ ૨૦૨૩માં અદ્ભુત પ્રદર્શન કરી રહી છે. પ્રથમ બે મેચમાં ખેલાડીઓએ જે પ્રકારનું પ્રદર્શન બતાવ્યું છે તેના પરથી લાગી રહ્યું છે કે આવનારા દિવસોમાં પણ આ કાફલો અહીં જ અટકવાનો નથી. ઓસ્ટ્રેલિયા વિરૂદ્ધ પ્રથમ મેચમાં વિરાટ કોહલી અને કેએલ રાહુલે શાનદાર ઇનિંગ્સ રમી ત્યારે અફઘાનિસ્તાન સામે કેપ્ટન રોહિત શર્માના બેટથી એવી આગ લાગી કે આખી દુનિયા જોતી રહી. ઈશાન કિશન, વિરાટ કોહલી અને શ્રેયસ અય્યરે પણ સારા હાથ બતાવ્યા. આ દરમિયાન શ્રેયસ અય્યરે ભલે ૨૫ રનની ટૂંકી ઈનિંગ રમી હોય, પરંતુ તેણે એવો રેકોર્ડ બનાવ્યો છે, જેને તોડવો તો દૂરની વાત છે, અન્ય બેટ્સમેનો માટે વિચારવું પણ મુશ્કેલ હશે.
દિલ્હીના અરુણ જેટલી સ્ટેડિયમમાં રમાયેલી મેચમાં ચોથા નંબરે આવેલા શ્રેયસ અય્યરે ૨૩ બોલમાં ૨૫ રન બનાવ્યા હતા. જેમાં એક ફોર અને એક સિક્સ સામેલ હતી. પરંતુ આ એક સિક્સર ફટકારીને શ્રેયસ અય્યરે એક નવો રેકોર્ડ બનાવ્યો. તેનો સિક્સ ૧૦૧ મીટરનો હતો, જે આ વર્ષના વર્લ્ડ કપમાં સૌથી લાંબો સિક્સ હતો. રસપ્રદ વાત એ છે કે આના થોડા સમય પહેલા રોહિત શર્માએ ૯૩ મીટર લાંબી સિક્સ ફટકારી હતી, પરંતુ શ્રેયસ અય્યરે આવતાની સાથે જ પોતાના કેપ્ટનનો રેકોર્ડ તોડી નાખ્યો હતો.
જો આપણે વનડે વર્લ્ડ કપ ૨૦૨૩માં સૌથી લાંબી છગ્ગાની વાત કરીએ તો હવે શ્રેયસ અય્યર ૧૦૧ મીટર લાંબી સિક્સ ફટકારીને નંબર વન પર પહોંચી ગયો છે. જ્યારે રોહીત શર્મા ૯૩ મીટરમાં સિક્સ ફટકારીને બીજા સ્થાને છે. સાઉથ આફ્રિકાના માર્કો જાનસેને ૮૯ મીટર લાંબી સિક્સ ફટકારી હતી, થોડા દિવસો પહેલા સુધી તે સૌથી લાંબી સિક્સ મારવાના મામલે નંબર વન પર હતો, પરંતુ હવે તે ત્રીજા સ્થાને સરકી ગયો છે. ઈંગ્લેન્ડના જોસ બટલરે ન્યુઝીલેન્ડ સામે ૮૮ મીટર લાંબી સિક્સ ફટકારી હતી. જોસ બટલર પણ આ યાદીમાં પાંચમા નંબરે છે. તેણે આ જ મેચમાં ન્યૂઝીલેન્ડ સામે ૮૭ મીટરની છગ્ગા પણ ફટકારી હતી. વર્લ્ડ કપમાં અત્યાર સુધી ૯ મેચ રમાઈ છે. હજુ ૩૯ મેચ બાકી છે. શ્રેયસ અય્યરનો સૌથી લાંબી છગ્ગાનો રેકોર્ડ કોઈ તોડે છે કે કેમ કે ભવિષ્યમાં પણ શ્રેયસ અય્યર નંબર વન પર રહે છે કે કેમ તે જોવું રહ્યું.