નવીદિલ્હી, બસપા સાંસદ કુંવર દાનિશ અલી પર ભાજપના સાંસદ રમેશ બિધુરીની અભદ્ર ટિપ્પણીને લઈને વિવાદ વધી રહ્યો છે. એક તરફ વિપક્ષી પાર્ટીઓના ગઠબંધન ઇન્ડિયા ગૃહની ગરિમાને ઠેસ પહોંચાડવા અને અપમાનજનક નિવેદનો કરવા માટે ભાજપ પર પ્રહારો કરી રહી છે, તો બીજી તરફ બીજેપી સાંસદો બિધુરીના બચાવમાં આવ્યા છે. બીજેપી સાંસદ રવિ કિશને પણ બિધુરીના નિવેદનની નિંદા કરતા દાનિશ અલીને ઘેર્યા છે. નિશિકાંત દુબે બાદ હવે રવિ કિશને દાનિશ અલીને લઈને લોક્સભા સ્પીકર ઓમ બિરલાને પત્ર લખ્યો છે, જેમાં તેણે દાનિશ અલીને સીરિયલ ઓફેન્ડર કહ્યો છે.
મીડિયા સાથે વાત કરતા રવિ કિશને કહ્યું કે, રમેશ બિધુરી દ્વારા દાનિશ અલી પર કરવામાં આવેલી ટિપ્પણી યોગ્ય નથી. હું તેમના નિવેદનને સમર્થન આપતો નથી. પરંતુ વાત એ છે કે જો રમેશ બિધુરી વિરુદ્ધ સંસદમાં કાર્યવાહી થઈ રહી છે તો દાનિશ અલી વિરુદ્ધ પણ એ જ કાર્યવાહી થવી જોઈએ. હવે તમે પૂછશો, કેમ? હું કહેવા માંગુ છું કે હું બે વાર સંસદમાં બોલવા ઉભો થયો અને તેઓએ મારા પર અભદ્ર ટિપ્પણી કરી. જ્યારે વસ્તી નિયંત્રણ બિલ આવી રહ્યું હતું, ત્યારે તેણે મારા પરિવાર વિશે ટિપ્પણી કરી હતી. મને ખાતરી છે કે લોક્સભાના સ્પીકર આ તરફ ધ્યાન આપશે. હું પત્ર લખી રહ્યો છું અને તેનો ડ્રાફ્ટ તૈયાર થઈ ગયો છે. તેણે આવું બે વાર કર્યું છે. પત્રમાં મેં વિનંતી કરી છે કે જો રમેશ બિધુરી વિરુદ્ધ કાર્યવાહી કરવામાં આવી રહી છે તો દાનિશ અલી વિરુદ્ધ પણ કાર્યવાહી કરવામાં આવે.
સ્પીકરને લખેલા પત્રમાં રવિકિશને કહ્યું કે જ્યારે હું બિલ રજૂ કરી રહ્યો હતો ત્યારે દાનિશ અલીએ મારી વિરુદ્ધ અંગત ટિપ્પણી કરી હતી કે તેમને પોતે ૪ બાળકો છે. દાનિશ અલીને લોક્સભામાં લોકોને અટકાવવાની અને હેરાન કરવાની આદત છે. તેમણે આ મામલે તપાસની માંગ કરી છે.