- કોર્ટે સજા સાથે ૫ લાખ રૂપિયાના દંડ પર પણ રોક લગાવી દીધી છે.
અલ્હાબાદ, અલ્હાબાદ હાઈકોર્ટમાં ગેંગસ્ટર મુખ્તાર અંસારી કેસની સજા અંગે સુનાવણી હાથ ધરવામાં આવી હતી. આ દરમિયાન કોર્ટે મુખ્તાર અંસારીની જામીન અરજી સ્વીકારી લીધી હતી. આ ઉપરાંત કોર્ટે સજા સાથે ૫ લાખ રૂપિયાના દંડ પર પણ રોક લગાવી દીધી છે. જોકે કોર્ટે સજા પર સ્ટે આપવાનો ઇન્કાર કરી દીધો છે. તમને જણાવી દઈએ કે મુખ્તાર અંસારીની તરફથી જામીન અને સજા પર સ્ટે આપવા અંગે અરજી દાખલ કરવામાં આવી હતી, જેના પર સુનાવણી દરમિયાન કોર્ટે આ નિર્ણય આપ્યો હતો. મુખ્તારને આપવામાં આવેલી સજા સામે કોર્ટમાં સુનાવણી ચાલુ રહેશે. દલીલો પૂર્ણ થયા બાદ હાઈકોર્ટે ૨૦ સપ્ટેમ્બરે આ અંગેનો નિર્ણય અનામત રાખ્યો હતો. તમને જણાવી દઈએ કે આ મામલે નિર્ણય જસ્ટિસ રાજવીર સિંહની સિંગલ બેન્ચે આપ્યો છે.
કોર્ટમાં સુનાવણી દરમિયાન મુખ્તાર અંસારીના વકીલે કોર્ટને કહ્યું કે મુખ્તાર અંસારી છેલ્લા ૧૨ વર્ષ અને ચાર મહિનાથી જેલમાં છે. મુખ્તારને જે સજા સંભળાવવામાં આવી છે તેના કરતાં વધુ ટ્રાયલ દરમિયાન તેણે સહન કર્યું છે. તમને જણાવી દઈએ કે આ જ ગેંગસ્ટર કેસમાં મુખ્તાર અંસારીના ભાઈ અફઝલ અંસારીને ચાર વર્ષની જેલની સજા સંભળાવવામાં આવી છે. જો કે અફઝલ પહેલા જ જામીન પર જેલમાંથી બહાર આવી ચૂક્યો છે. આ સજા બાદ અફઝલ અંસારીની સંસદની સદસ્યતા ખતમ કરી દેવામાં આવી હતી.
ગાઝીપુર જિલ્લાના પૂર્વ સાંસદ અફઝલ અંસારી વિરુદ્ધ ગેંગસ્ટર કેસની સુપ્રીમ કોર્ટમાં સુનાવણી થવા જઈ રહી છે. અફઝલ અંસારીને ૪ વર્ષની સજા સંભળાવ્યા બાદ સંસદનું સભ્યપદ રદ્દ કરવામાં આવ્યું હતું. આ સંદર્ભમાં અફઝલ અંસારીએ સુપ્રીમ કોર્ટમાં દોષિત ઠેરવવા પર રોક લગાવવાની માંગ કરી હતી. આ અંગે આજે સુપ્રીમ કોર્ટમાં સુનાવણી હાથ ધરવામાં આવનાર છે. યુપી સરકાર આજે સુપ્રીમ કોર્ટમાં આ મામલે પોતાનો જવાબ આપવા જઈ રહી છે. તમને જણાવી દઈએ કે ૨૯ એપ્રિલના રોજ અફઝલ અંસારીને સાંસદ-ધારાસભ્ય કોર્ટે ગેંગસ્ટર કેસમાં દોષી ઠેરવ્યો હતો અને ૪ વર્ષની જેલની સજા સંભળાવી હતી. આ પછી અફઝલ અંસારીની સંસદ સભ્યતા રદ્દ કરવામાં આવી હતી.