કરન જોહરે હાલમાં જ કેનેડામાં ટોરોન્ટો ફિલ્મ ફેસ્ટિવલમાં હાજરી આપી હતી. આ દરમિયાન તેમણે પ્રિયંકા ચોપરાના હોલિવૂડ ફિલ્મો કરવાના નિર્ણય પર પણ પ્રતિક્રિયા આપી હતી. તેમણે હોલિવૂડની ફિલ્મોમાં મળેલી સફળતા માટે પ્રિયંકાની પ્રશંસા પણ કરી હતી.
ફિલ્મ ફેસ્ટિવલ દરમિયાન ET કેનેડાએ કરન જોહરને પૂછ્યું હતું કે આ દિવસોમાં પ્રિયંકા હોલિવૂડમાં શાનદાર કામ કરી રહી છે. પ્રિયંકાની સફળતા અને બોલિવૂડમાંથી હોલિવૂડમાં શિફ્ટ થવાના તેના નિર્ણય વિશે તમે શું વિચારો છો? તેના પર કરન જોહરે કહ્યું કે પ્રિયંકાનો નિર્ણય શાનદાર હતો. તેમણે કહ્યું- પ્રિયંકાને સ્ટેપ બાય સ્ટેપ આગળ વધતી જોઈને મને ખુબ જ સારું લાગે છે.
કરન જોહરે કહ્યું, હું ખુશ છું કે આજે પ્રિયંકાને તે ખુશી અને સફળતા મળી જે તે હંમેશા ઇચ્છતી હતી, તે પણ પોતાની શરતો પર. પ્રિયંકાએ દરેક પ્લેટફોર્મ પર પોતાનું પ્રભુત્વ જમાવ્યું છે અને તે આ સફળતાની યોગ્ય રીતે હકદાર છે.
વર્ષની શરૂઆતમાં પ્રિયંકાએ ડેક્સ શેફર્ડના પોડકાસ્ટ શો આર્મચેર એક્સપર્ટ સાથે વાત કરતા કહ્યું હતું કે ‘બોલિવૂડમાં બહારના લોકોને ભાગ્યે જ કામ કરવાની તક આપવામાં આવે છે. પ્રિયંકાએ એમ પણ કહ્યું હતું કે તે બોલિવૂડની રાજનીતિથી નારાજ છે અને તેના કારણે જ ઇન્ડસ્ટ્રીથી દૂર છે.’
બોલિવૂડથી દૂર રહેવા પાછળના કારણ વિશે વાત કરતાં પ્રિયંકાએ કહ્યું હતું કે મને બોલિવૂડમાં કોર્નર કરવામાં આવી રહી છે. લોકો મને તેમની ફિલ્મોમાં કાસ્ટ કરવા તૈયાર નહોતા, લોકોને મારી સામે ઘણી ફરિયાદો પણ હતી. હું તેમની જેમ તેમની રમતોમાં ભાગ લેવા ઇચ્છતી ન હતી, તેથી મેં આ ઉદ્યોગમાંથી બ્રેક લીધો છે.
આ દરમિયાન પ્રિયંકાએ કોઈનું નામ લીધું ન હતું. પરંતુ, સોશિયલ મીડિયા પર યુઝર્સ અનુમાન લગાવી રહ્યા હતા કે પ્રિયંકાએ કરન જોહર પર નિશાન સાધ્યું છે. થોડા દિવસો પછી કંગના રનૌતે પણ કહ્યું કે કરન જોહરે પ્રિયંકા જેવી સેલ્ફ મેડ મહિલાને એટલી હેરાન કરી કે તેમણે આખરે ઈન્ડસ્ટ્રી છોડવી પડી થી.
પ્રિયંકા 2015માં અમેરિકન શો ક્વોન્ટિકોમાં જોવા મળી હતી. ત્યારથી પ્રિયંકાએ ‘બેવોચ’,’મેટ્રિક્સ’ અને ‘લવ અગેન’ જેવી ઘણી હોલિવૂડ ફિલ્મોમાં કામ કર્યું છે. ફિલ્મો પહેલાં પ્રિયંકાએ અમેરિકન સંગીતમાં પણ હાથ અજમાવ્યો હતો. હાલમાં જ પ્રિયંકા પ્રાઈમ વિડિયો સિરીઝ ‘સિટાડેલ’માં જોવા મળી હતી.
સમગ્ર ઘટના વિશે વાત કરવામાં આવે તો કરન જોહર અને પ્રિયંકા વચ્ચે 2012થી અણબનાવ ચાલી રહ્યો છે. તે દિવસોમાં પ્રિયંકા અને શાહરુખના અફેરની ચર્ચા જોરમાં હતી. કરન જોહર શાહરૂખ અને તેની પત્ની ગૌરી ખાનનો ખૂબ જ સારો મિત્ર છે. એવું માનવામાં આવતું હતું કે કરન જોહર પ્રિયંકાને શાહરુખના જીવનમાંથી દૂર રાખવાનો પ્રયાસ કરી રહ્યો હતો.
થોડા દિવસ પહેલાં મુંબઈ મિરર સાથે વાત કરતી વખતે પ્રિયંકાના મિત્રએ કરન જોહરના પ્રિયંકા પ્રત્યેના વલણ વિશે ખુલીને વાત કરી હતી. આ પછી કરન જોહરે નામ લીધા વગર ટ્વીટ કર્યું હતું કે કેટલાક લોકોએ પીઆર મશીનરી ભાડે લીધી છે. આ પછી પ્રિયંકા 2019માં કરન જોહરના ચેટ શો ‘કોફી વિથ કરન’માં જોવા મળી હતી. હાલમાં જ પ્રિયંકા મુંબઈમાં નીતા મુકેશ અંબાણી કલ્ચરલ સેન્ટરના ઉદ્ઘાટન સમારોહમાં કરન જોહરને પણ મળી હતી.
કેનેડામાં, ટોરોન્ટો ડાઉનટાઉન સેન્ટરમાં 7 થી 17 સપ્ટેમ્બર દરમિયાન ટોરોન્ટો ફિલ્મ ફેસ્ટિવલ ઉજવવામાં આવી રહ્યો છે. આ સમય દરમિયાન, અભિનેતા લક્ષ્ય સ્ટારર એક્શન-થ્રિલર ફિલ્મ કિલનું પ્રીમિયર પણ થયું. આ ફિલ્મનું નિર્માણ કરન જોહર દ્વારા કરવામાં આવ્યું છે અને નિખિલ નાગેશ ભટ્ટ ફિલ્મના નિર્દેશક છે.