આંગણવાડી કેન્દ્રો આપણા સમાજના સર્વાંગી વિકાસનું અતિ મહત્વપૂર્ણ કેન્દ્ર છે -જિલ્લા પંચાયત પ્રમુખ શ્રીમતી કલ્પનાબેન પુવાર
‘વિકસિત ભારત’ના નિર્માણ માટે મજબૂત બાળ પેઢીનો પાયો પોષણ, શિક્ષણ અને સંસ્કાર થકી જ નંખાય છે, તેવા ઉમદા આશય સાથે વિકસિત ભારત જન સેવા અભિયાન અંતર્ગત સાકરીયા આંગણવાડી કેન્દ્ર ખાતે વિશેષ ‘આંગણ મિલન’ કાર્યક્રમ યોજાયો હતો. જિલ્લા પંચાયત પ્રમુખ શ્રીમતી કલ્પનાબેન પુવારની અધ્યક્ષતામાં આયોજિત આ કાર્યક્રમમાં આઈસીડીએસ (ICDS) અધિકારી શ્રીમતી અંબિકાબેન, સ્થાનિક સરપંચશ્રી, ગ્રામજનો, મોટી સંખ્યામાં માતાઓ તેમજ ભૂલકાંઓ ઉત્સાહપૂર્વક ઉપસ્થિત રહ્યા હતા.
કાર્યક્રમમાં અધ્યક્ષીય ઉદ્બોધન આપતાં જિલ્લા પંચાયત પ્રમુખ શ્રીમતી કલ્પનાબેન પુવારે જણાવ્યું હતું કે, આંગણવાડી કેન્દ્રો આપણા સમાજના સર્વાંગી વિકાસનું અતિ મહત્વપૂર્ણ કેન્દ્ર છે. બાળકોના ઉત્કૃષ્ટ આરોગ્ય, યોગ્ય પોષણ, પાયાના શિક્ષણ અને સંસ્કારની મજબૂત શરૂઆત આંગણવાડીના આંગણેથી જ થાય છે. બાળક સ્વસ્થ, સુપોષિત અને સુશિક્ષિત બનશે ત્યારે જ ગુજરાત અને ભારત વધુ સશક્ત બનશે.
તેમણે વધુમાં ઉમેર્યું હતું કે, વિકસિત ભારતનું સ્વપ્ન માત્ર મોટા વિકાસકાર્યો પૂરતું સીમિત નથી, પરંતુ છેવાડાના ગામના પ્રત્યેક બાળક સુધી ઉત્તમ પોષણ, ગુણવત્તાયુક્ત શિક્ષણ અને સરકારી કલ્યાણકારી સેવાઓ પહોંચે એ જ સાચા અર્થમાં વાસ્તવિક જનસેવા અને વિકાસ છે.સરકારની વિવિધ યોજનાઓનો લાભ જરૂરિયાતમંદ પરિવારો સુધી સમયસર પહોંચાડવા અને કોઈ પણ બાળક શિક્ષણ કે પોષણથી વંચિત ન રહે તે માટે સમાજના સૌ નાગરિકો સાથે મળીને જવાબદારી નિભાવે તેવો આગ્રહ તેમણે વ્યક્ત કર્યો હતો.
આ પ્રસંગે ઉપસ્થિત સૌ મહાનુભાવો, માતાઓ અને ગ્રામજનોએ બાળકોના સર્વાંગી ઉત્કર્ષ, સુપોષણ અને ગામના ઉજ્જવળ ભવિષ્ય માટે એકજૂટ થઈને કાર્ય કરવાનો સામૂહિક સંકલ્પ લીધો હતો.
