અંકલેશ્વર શહેરમાં ચાલતી કારમાં જીવના જોખમે સ્ટંટ કરતાં 6 યુવાનોનો વીડિયો સોશ્યલ મીડિયામાં વાઈરલ થયો છે. જાહેર માર્ગ પર સ્ટંટ કરતા યુવાનો અન્ય વાહનચાલકો માટે જોખમકારક સાબિત થઈ રહ્યા છે. જ્યારે નવાઈની વાત તો એ છે કે કારમાં જે યુવક ડ્રાઈવિંગ કરતો હતો તે નબીરો પણ બારીમાંથી બહાર આવીને નાચ કરતો હતો. આ નબીરાઓએ તેમની સાથે અન્યના જીવ પણ જોખમમાં મૂક્યા હતા. તાજેતરમાં જ ઇસ્કોન બ્રિજ પર અકસ્માત થયો હતો, જેમાં નબીરા દ્વારા અકસ્માતમાં 10 લોકોના જીવ ગયા છે. ત્યારે આ યુવાનો વિરુદ્ધ કાયદેસરની કાર્યવાહી કરી સબક શીખડવામાં આવે તેવી લોક માગ ઉઠી છે.
કારચાલક પણ બારીમાંથી બહાર નીકળી નાચવા મંડ્યો
નવાઈની વાત તો એ છે કે કારચલાક પોતે પણ સ્ટેરિંગ પકડીને તેની વિન્ડોમાંથી બહાર નીકળીને સ્ટંટ કરતો નજરે પડે છે. આ સમયે તેમની પાછળથી અન્ય વાહનો પણ પસાર થતાં દેખાઈ રહ્યા છે. આ સ્ટંટ કરતાં યુવાનો પોતે તો જીવનું જોખમ ઉઠાવી રહ્યા છે, પરંતુ સાથે સાથે અન્ય લોકોના જીવ સાથે પણ ચેડાં કરી રહ્યા છે. જેથી આ યુવાનો સામે કાયદેસરની કાર્યવાહી કરીને સબક શીખડવામાં આવે તેવી લોકો માગ કરી રહ્યા છે.