ઇસ્લામાબાદ, પાકિસ્તાનના ભૂતપૂર્વ વડા પ્રધાન ઈમરાન ખાનની પાર્ટીથી અલગ થઈ ગયેલા ગુલબર ખાનને ગુરુવારે ગિલગિટ-બાલ્ટિસ્તાન ક્ષેત્રના નવા મુખ્ય પ્રધાન તરીકે ચૂંટવામાં આવ્યા હતા. મીડિયા અહેવાલો અનુસાર, પાકિસ્તાન તહરીક-એ-ઈન્સાફ (પીટીઆઈ) પાર્ટીના અન્ય સભ્ય ખાલિદ ખુર્શીદ ખાનને બનાવટી ડિગ્રી કેસમાં આ મહિનાની શરૂઆતમાં મુખ્યમંત્રી પદ માટે અયોગ્ય ઠેરવવામાં આવ્યા બાદ તેઓ ચૂંટાયા હતા.
ગુલબારે અગાઉની પીટીઆઈ સરકાર દરમિયાન ગિલગિટ-બાલ્ટિસ્તાનના આરોગ્ય પ્રધાન તરીકે અને ૨૦૧૦-૨૦૧૧માં જમિયત ઉલેમા-એ-ઈસ્લામ-ફઝલના સભ્ય તરીકે સેવા આપી છે. ભારતે વારંવાર કહ્યું છે કે કહેવાતા ‘ગિલગિટ-બાલ્ટિસ્તાન’ સહિત સમગ્ર જમ્મુ અને કાશ્મીર રાજ્ય ભારતનો અભિન્ન અંગ છે અને રહેશે.
વિદેશ મંત્રાલયે કહ્યું છે કે પાકિસ્તાન સરકાર અથવા ન્યાયતંત્રને તે પ્રદેશોમાં હસ્તક્ષેપ કરવાનો કોઈ અધિકાર નથી કે જેના પર તેણે ગેરકાયદેસર અને બળજબરીથી કબજો કર્યો છે. ગિલગિટ-બાલ્ટિસ્તાન વ્યૂહાત્મક મહત્વનો વિસ્તાર છે કારણ કે તે પાકિસ્તાનને ચીન સાથે જોડે છે અને બહુ-અબજો ડોલરનો ચાઇના-પાકિસ્તાન ઇકોનોમિક કોરિડોર તેમાંથી પસાર થાય છે.