શ્રી ગોવિંદ ગુરુ યુનિવર્સિટી, વિંઝોલ ખાતે ભારત સરકારના ‘નશા મુક્ત વિકસિત ભારત’ અભિયાન અંતર્ગત પ્રેરણાદાયી કાર્યક્રમનું આયોજન કરવામાં આવ્યું હતું. યુનિવર્સિટીના કુલપતિ પ્રો. હરીભાઈ કાતરીયાના માર્ગદર્શન અને અધ્યક્ષસ્થાને યોજાયેલા આ કાર્યક્રમમાં સૌપ્રથમ નશા મુક્તિની જાગૃતિ સંદર્ભે એક નાટીકા રજૂ કરવામાં આવી હતી. ત્યારબાદ પ્રધાનમંત્રી નરેન્દ્ર મોદીના રાષ્ટ્રને સંબોધતા પ્રેરણાદાયી ઉદ્બોધનનું લાઈવ પ્રસારણ નિહાળવામાં આવ્યું હતું.
આ પ્રસંગે પંચમહાલ જિલ્લાના કલેક્ટર અજય દહિયા, ભાજપ પંચમહાલ જિલ્લા મહામંત્રી ડૉ. કુલદીપસિંહ સોલંકી, ભાજપ યુવા મોરચાના જિલ્લા પ્રમુખ હાર્દિક બારિયા, વિશ્વવિદ્યાલયના વિવિધ વિદ્યાશાખાઓના વિભાગાધ્યક્ષશ્રીઓ, પ્રાધ્યાપકગણ, અધિકારીઓ, કર્મચારીઓ તથા મોટી સંખ્યામાં દેશના યુવાધન તરીકે મોટી સંખ્યામાં વિદ્યાર્થીઓ ઉપસ્થિત રહ્યા હતા.
કાર્યક્રમને સંબોધતા કુલપતિ પ્રો. હરીભાઈ કાતરીયાએ જણાવ્યું હતું કે, “યુવાધન દેશની સૌથી મોટી શક્તિ છે. વિકસિત અને આત્મનિર્ભર ભારતના નિર્માણ માટે યુવાનોનું નશામુક્ત, સ્વસ્થ અને ચારિત્ર્યવાન હોવું અનિવાર્ય છે. શ્રી ગોવિંદ ગુરુ યુનિવર્સિટી વિદ્યાર્થીઓને ગુણવત્તાસભર શિક્ષણની સાથે ઉત્તમ સંસ્કાર અને ચારિત્ર્ય નિર્માણ માટે પણ સતત પ્રયત્નશીલ છે.”
પંચમહાલ જિલ્લાના કલેક્ટર અજય દહિયાએ પોતાના સંબોધનમાં જિલ્લામાં નશાવિરોધી જનજાગૃતિ વધુ વ્યાપક બનાવવા માટે પ્રશાસનની પ્રતિબદ્ધતા વ્યક્ત કરી હતી. તેમણે યુવાનોને નશાના વ્યસનથી દૂર રહી સમાજ અને રાષ્ટ્રના સર્વાંગી વિકાસમાં સક્રિય યોગદાન આપવા અનુરોધ કર્યો હતો.
ભાજપ પંચમહાલ જિલ્લા મહામંત્રી ડૉ. કુલદીપસિંહ સોલંકીએ પ્રધાનમંત્રીશ્રીના *વિકસિત ભારત @૨૦૪૭* ના સંકલ્પને સાકાર કરવા માટે યુવાનોને ‘નશામુક્ત ભારત’ અભિયાનમાં સક્રિય સહભાગી બનવા આહ્વાન કર્યું હતું.
ભાજપ યુવા મોરચાના જિલ્લા પ્રમુખ હાર્દિક બારિયાએ યુવાઓને નશામુક્ત જીવનશૈલી અપનાવી સમાજમાં સકારાત્મક પરિવર્તન લાવવાનું આહ્વાન કર્યું હતું.
કાર્યક્રમ દરમિયાન ઉપસ્થિત મહાનુભાવોએ નશાના દૂષણ સામે સમાજમાં જાગૃતિ લાવવાની તેમજ સ્વસ્થ, સશક્ત અને વિકસિત ભારતના નિર્માણમાં સૌએ સહભાગી બનવાની જરૂરિયાત પર ભાર મૂક્યો હતો.
કાર્યક્રમના અંતે પ્રધાનમંત્રીના સંબોધન બાદ ઉપસ્થિત તમામ મહાનુભાવો, અધ્યાપકો, કર્મચારીઓ અને વિદ્યાર્થીઓએ ‘નશામુક્ત ભારત’ માટે સામૂહિક શપથ ગ્રહણ ડૉ. હેમેન્દ્ર શાહે કરાવ્યું હતું. સૌએ રાષ્ટ્ર નિર્માણમાં સક્રિય યોગદાન આપવાનો સંકલ્પ વ્યક્ત કર્યો હતો. સમગ્ર કાર્યક્રમ ઉત્સાહ, શિસ્ત અને રાષ્ટ્ર્રભાવનાના માહોલમાં સફળતાપૂર્વક સંપન્ન થયો હતો. આ કાર્યક્રમનું સફળ સંચાલન ડૉ. ભાવપ્રકાશ ગાંધી અને આભારવિધિ ડૉ. મૌનિક જાનીએ કરી હતી..