અમદાવાદ, રથયાત્રાના તહેવાર નજીક છે ત્યારે શહેરમાં દારૂ કે અન્ય પ્રતિબંધિત વસ્તુઓ ન ઘૂસે તે માટે ઉચ્ચ પોલીસ અધિકારીઓ તરફથી સૂચના અપાઇ હતી. તેથી ઝોન-૧ ડીસીપીની એલસીબીએ બાતમી મળતા જ ગોતામાંથી ૨૩ લાખનો ૬૯૮ પેટી દારૂનો જથ્થો ઝડપી લીધો છે.
આ દારૂનો જથ્થો ટ્રકમાં લવાયો હતો અને તેમાંથી કટિંગ કરી ઇકો વાનમાં ભરવામાં આવી રહ્યો હતો. ગ્રેનાઇટ-માર્બલની ફેક્ટરીના કમ્પાઉન્ડમાં આ ગતિવિધિ ચાલતી હતી. આ દરમિયાન જ પોલીસે રેડ કરી કુલ ૩૫ લાખનો મુદ્દામાલ કબજે લીધો હતો. આ દારૂ પંજાબથી લાવીને અમદાવાદમાં સપ્લાય કરવાનો હતો. પોલીસે આ બાબતે તપાસ શરૂ કરી છે.
ગોતામાં ગ્રેનાઇટ-માર્બલની એક ફેક્ટરીના કમ્પાઉન્ડમાં કેટલાક શખ્સો દારૂનો જથ્થો ઠાલવી કટિંગ કરી રહ્યા હોવાની બાતમીને મળતા ઝોન-૧ એલસીબીએ સોલા પોલીસને સાથે રાખી ગોતામાં આવેલા વિસત એસ્ટેટમાં જય અંબે ગ્રેનાઇટ-માર્બલના કમ્પાઉન્ડમાં રેડ કરી હતી. પોલીસને જોતા જ દારૂનું કટિંગ કરી રહેલા શખ્સો ફરાર થઇ ગયા હતા. પોલીસે તપાસ કરી તો એક ટ્રક, ઇકો ગાડી જેવા વાહનો મળી આવ્યા હતા.
પોલીસે આ વાહનોમાંથી ૨૩.૯૨ લાખનો કુલ ૬૯૮ પેટી દારૂનો જથ્થો અને વાહનો મળી ૩૫.૪૨ લાખનો મુદ્દામાલ કબજે કર્યો હતો. પોલીસે વાહનોના નંબરો તપાસતા ઇકો ગાડીની નંબર પ્લેટ ખોટી લગાવી હોવાનું સામે આવ્યું હતું. પીએસઆઇ એચ.એચ. જાડેજાએ જણાવ્યું કે આરોપીઓ ટ્રકમાં કપાસની ગાંસડીની આડમાં પંજાબથી આ દારૂનો જથ્થો લાવી અમદાવાદમાં અલગ અલગ જગ્યાએ સપ્લાય કરવાના હતા. આરોપીઓની શોધખોળ હાથ ધરાઇ છે.