જેરુસલેમ , ઈજિપ્તે ઈઝરાઇલ અને ઈસ્લામિક જેહાદ ઓર્ગેનાઈઝેશન ઓફ પેલેસ્ટાઈન વચ્ચે યુદ્ધવિરામની વ્યવસ્થા કરી છે. અઠવાડિયા સુધી ચાલેલી હિંસામાં ૧૨ નાગરિકો સહિત ૩૩ પેલેસ્ટિનિયનોના જીવ ગયા હતા.તે જ સમયે, ઇસ્લામિક જેહાદ સંગઠને ઇઝરાઇલ પર એક હજારથી વધુ રોકેટ છોડ્યા હતા. જેના કારણે ઘણા ઇઝરાયલીઓએ બંકરોમાં આશરો લેવો પડ્યો હતો. માહિતી આપતા ઇજિપ્તની ટીવી ચેનલ અલ-કાહેરાએ કહ્યું કે યુદ્ધવિરામ રાત્રે ૧૦ વાગ્યાથી અમલમાં આવ્યો.યુદ્ધવિરામને લઈને પેલેસ્ટાઈનના ઈસ્લામિક જેહાદ સંગઠને કહ્યું કે અમે આ યુદ્ધવિરામનું પાલન કરવાની જાહેરાત કરીએ છીએ. જ્યાં સુધી ઇઝરાઇલ હુમલો ન કરે ત્યાં સુધી તેને સ્વીકારીશું. જો ઈઝરાઇલ હુમલો કરશે તો અમે પણ શાંત નહીં રહીએ.
ઇઝરાઇલની સેનાએ અલજઝીરાને જણાવ્યું કે તેઓ યુદ્ધવિરામનું મૂલ્યાંકન કરી રહ્યા છે. તેમાં વડા પ્રધાન નેતન્યાહુ અને સંરક્ષણ પ્રધાન યોવ ગાલાંટ પણ હાજરી આપશે. આ દરમિયાન સૈન્યના ગુપ્તચર અધિકારીઓ બંનેને પરિસ્થિતિ વિશે સંપૂર્ણ માહિતી આપશે.
ઈઝરાઇલના હવાઈ હુમલામાં ઈસ્લામિક જેહાદના ૩ ટોચના કમાન્ડર માર્યા ગયા હતા. આ પછી, જવાબી કાર્યવાહીમાં, પેલેસ્ટાઈન તરફથી સતત રોકેટ છોડવામાં આવ્યા હતા. ઇસ્લામિક જેહાદના લડવૈયાઓ ઉપરાંત સામાન્ય લોકોએ પણ આમાં જીવ ગુમાવ્યા હતા. અનેક મકાનો પણ ધરાશાયી થયા હતા. તે જ સમયે, ઇસ્લામિક જેહાદ દ્વારા છોડવામાં આવેલા રોકેટમાં ૮૦ વર્ષીય ઇઝરાઇલી મહિલાનું પણ મૃત્યુ થયું હતું.
પેલેસ્ટાઈન ઈસ્લામિક જેહાદ સંગઠન ૧૯૮૧માં બનાવવામાં આવ્યું હતું. તેની શરૂઆત ઇજિપ્તમાં અભ્યાસ કરતા પેલેસ્ટિનિયન છોકરાઓએ કરી હતી. તે વેસ્ટ બેંક, ગાઝા અને ઈઝરાયેલના કબજા હેઠળના વિસ્તારો પર પેલેસ્ટાઈનનો કબજો ઈચ્છે છે. ઈઝરાયેલ આ સંગઠનને ઈરાનનું સાથી ગણાવે છે. જેઓ ઇઝરાયલનો નાશ કરવા માંગે છે. પેલેસ્ટાઈનને સ્વતંત્રતા અપાવનાર અન્ય મોટા સંગઠનોની સરખામણીમાં ઈસ્લામિક જેહાદ સંગઠન નાનું છે. તેને ઈરાન પાસેથી ભંડોળ મળે છે.
મધ્ય પૂર્વના આ વિસ્તારમાં ઓછામાં ઓછા ૧૦૦ વર્ષથી આ સંઘર્ષ ચાલી રહ્યો છે. વેસ્ટ બેંક, ગાઝા સ્ટ્રીપ અને ગોલાન હાઇટ્સ જેવા વિસ્તારો પર વિવાદ ચાલી રહ્યો છે. પેલેસ્ટાઈન આ વિસ્તારો સહિત પૂર્વ જેરુસલેમ પર દાવો કરે છે. સાથે જ ઈઝરાઇલ જેરુસલેમ પરનો પોતાનો દાવો છોડવા તૈયાર નથી.