- ઈડીએ આ મામલે રાજ ઠાકરેની પણ પૂછપરછ કરી છે.
મુંબઇ,મહારાષ્ટ્રમાં એન્ફોર્સમેન્ટ ડિરેક્ટોરેટ (ઈડી) એ એનસીપીના પ્રદેશ અધ્યક્ષ જયંત પાટિલને નોટિસ આપી છે. તેમને શુક્રવારે સવારે ૧૧ વાગ્યા સુધીમાં ઈડી ઓફિસમાં હાજર થવા માટે કહેવામાં આવ્યું છે. આ વખતે ઈડીએ આઇએલએન્ડએફએસ કેસમાં જયંત પાટિલને નોટિસ આપી છે. ઈડીએ આ મામલે રાજ ઠાકરેની પણ પૂછપરછ કરી છે.
તમને જણાવી દઈએ કે આઇએલએન્ડએફએસમાં કથિત નાણાકીય અનિયમિતતાનો મામલો તાજેતરમાં જ પ્રકાશમાં આવ્યો હતો. ઈડી આ મામલે મની લોન્ડરિંગની તપાસ કરી રહી છે. આ કિસ્સામાં, ઈડીએ જ ૨ ભૂતપૂર્વ ઓડિટર ફર્મ બીએસઆર એન્ડ એસોસિએટ્સ અને ડેલોઇટ હાસ્કિન્સ એન્ડ સેલ્સના પરિસરમાં દરોડા પાડ્યા હતા. આ બંને કંપનીઓ પર ઈડીનું આ સર્ચ ઓપરેશન પીએમએલએની જોગવાઈ હેઠળ હાથ ધરવામાં આવ્યું હતું. ઈડી સૂત્રોના જણાવ્યા અનુસાર, આ સર્ચ ઓપરેશન દરમિયાન કેન્દ્રીય એજન્સીએ ઘણા કર્મચારીઓની પૂછપરછ કરી અને કેટલાક શંકાસ્પદ દસ્તાવેજો જપ્ત કર્યા હતા.
ઈડી સૂત્રોના જણાવ્યા અનુસાર, આઇએલએન્ડએફએસમાં કથિત કૌભાંડ અને મની લોન્ડરિંગનો મામલો વર્ષ ૨૦૧૯માં પ્રકાશમાં આવ્યો હતો. આ મામલામાં સ્થાનિક સ્તરે તપાસ કરવામાં આવી હતી અને તપાસમાં મળેલા તથ્યોના આધારે વર્ષ ૨૦૧૯માં જ ઈડીએ પણ તેની તપાસ શરૂ કરી હતી. દિલ્હી પોલીસની આર્થિક અપરાધ શાખાએ આઇએલએન્ડએફએસ જૂથની કંપનીઓ આઇઆરએલ આઇટીએનએલ અને આ કંપનીઓમાં તૈનાત અધિકારીઓ સામે કેસ નોંધ્યો હતો.
ઈડીના સૂત્રોના જણાવ્યા અનુસાર આ કેસમાં કોહિનૂર કન્સ્ટ્રક્શનને આપવામાં આવેલી લોનના સંદર્ભમાં રાજ ઠાકરેની પૂછપરછ કરવામાં આવી છે અને હવે જયંત પાટીલને સમન્સ પાઠવવામાં આવ્યું છે. ઈડીની આ કાર્યવાહીથી મહારાષ્ટ્રના રાજકારણમાં ભૂકંપ આવી ગયો છે. રાજકીય નિષ્ણાતોનું માનવું છે કે સુપ્રીમ કોર્ટ ઉદ્ધવ ઠાકરે અને એકનાથ શિંદેના ભવિષ્યને લઈને મહત્વનો નિર્ણય લઈ શકે છે.
સરકાર લઘુમતીમાં આવે તેવી સંભાવના છે. આવી સ્થિતિમાં, માનવામાં આવે છે કે છેલ્લી ઘડીએ કરવામાં આવી રહેલી ઈડીની આ કાર્યવાહી સરકારને બચાવવા અથવા બીજી સરકાર બનાવવા માટે દબાણ તરીકે કામ કરશે. કહેવાય છે કે જયંત પાટીલ શરદ પવારની નજીક છે. આવી સ્થિતિમાં, શક્ય છે કે સરકાર લઘુમતીમાં આવ્યા પછી, એનસીપી સરકાર બનાવવામાં ભાજપની સહયોગી બને. આ દરમિયાન સમાચાર આવ્યા છે કે આઇએલએન્ડએફએસના ઘણા સ્થળો પર ઈડીના દરોડા ચાલી રહ્યા છે.