વડોદરા,રાજ્યમાં અવારનવાર જૂથ અથડામણની ઘટના સામે આવતી હોય છે. આવી જ એક ઘટના વડોદરાના પાણીગેટ વિસ્તારમાં બની છે. વડોદરાના પાણીગેટ વિસ્તારમાં બે યુવકની બબાલમાં મોટી અથડામણ થઈ હતી. બે યુવકો વચ્ચે વાહન ચલાવવાના મુદ્દે માથાકૂટ થઈ હતી. તેઓ વચ્ચે એકાએક ઝપાઝપી થતા એક યુવકને ચપ્પાનો ઘા મારતા મામલો વધુ બિચક્યો હતો.
યુવકને ચપ્પુ મારવાની વાત વાયુવેગે ફેલાતા બે જૂથના લોકો એકત્ર થયા હતા. જેમાં બે જૂથ સામ સામે આવી જતા પથ્થરમારાના દ્રશ્યો સર્જાયા હતા. ઘટનાની જાણ થતા પોલીસ તાત્કાલીક ધોરણે ઘટનાસ્થળે આવી પહોંચી હતી અને પરિસ્થિતિ પર કાબૂ મેળવ્યો હતો. વડોદરાના ઈન્ચાર્જ ડીસીપી પન્ના મોમાયા, એસીપી ગૌતમ પલસાણા, ક્રાઇમ બ્રાન્ચની ટીમ પણ સ્થળે પહોંચી હતી. ઘટના સ્થળ તથા આસપાસના વિસ્તારોમાં સઘન બંદોબસ્ત ગોઠવ્યો હતો.