ઇસ્લામાબાદ,પાકિસ્તાનના વડાપ્રધાન શહેબાઝ શરીફે નેશનલ એસેમ્બલીમાં વિશ્ર્વાસ મત જીતીને બધાને ચોંકાવી દીધા હતા. સરકાર અને ટોચના ન્યાયતંત્ર વચ્ચે વધતી જતી તકરાર વચ્ચે આશ્ર્ચર્યજનક હિલચાલમાં, ૧૮૦ સાંસદોએ શરીફના નેતૃત્વમાં સંપૂર્ણ વિશ્ર્વાસ વ્યક્ત કર્યો આથી પીએમ ઈમરાન ખાન પણ આશ્ર્ચર્યમાં છે. શરીફને વિશ્ર્વાસ મત જીતવા માટે શેહબાઝ માટે માત્ર ૧૭૨ મતોની જરૂર હતી. પાકિસ્તાન પીપલ્સ પાર્ટીના વડા અને વિદેશ પ્રધાન બિલાવલ ભુટ્ટો ઝરદારીએ નીચલા ગૃહમાં વડા પ્રધાન શરીફના નેતૃત્વમાં સંપૂર્ણ વિશ્ર્વાસનો પ્રસ્તાવ મૂક્યો હતો. આ પ્રસ્તાવને ૩૪૨ સભ્યોની નેશનલ એસેમ્બલીમાં ૧૮૦ સાંસદોએ ટેકો આપ્યો હતો.
ગયા વર્ષે એપ્રિલમાં જ્યારે શરીફ વડાપ્રધાન તરીકે ચૂંટાયા ત્યારે તેમને ૧૭૪ સાંસદોનું સમર્થન હતું. વડા પ્રધાન શરીફે બાદમાં ગૃહને સંબોધિત કર્યું અને તેમનામાં વિશ્ર્વાસ દર્શાવવા બદલ સાંસદોનો આભાર માન્યો. જો કે, અગાઉના માહિતી પ્રધાન મરિયમ ઔરંગઝેબે સોમવારે એવા અહેવાલોને ફગાવી દીધા હતા કે વડા પ્રધાન શરીફ ટોચના ન્યાયતંત્ર સાથેના સંઘર્ષ વચ્ચે સંસદમાં વિશ્ર્વાસનો મત માંગશે. પંજાબ અને ખૈબર પખ્તુનખ્વામાં ચૂંટણીઓ યોજવા માટે પાકિસ્તાનના ચૂંટણી પંચને ભંડોળ પૂરું પાડવા માટે સરકાર દ્વારા રજૂ કરાયેલા મની બિલને નેશનલ એસેમ્બલીએ નકારી કાઢ્યા બાદ શરીફ નવેસરથી વિશ્ર્વાસનો મત માગશે તેવી અટકળો ચાલી રહી હતી.
નેશનલ એસેમ્બલી આ વર્ષે ઓગસ્ટમાં તેનો પાંચ વર્ષનો કાર્યકાળ પૂર્ણ કરશે.બંધારણ મુજબ, નીચલા ગૃહના વિસર્જનના ૯૦ દિવસની અંદર ચૂંટણી યોજવામાં આવશે. મતલબ કે ઓક્ટોબરના મધ્ય સુધીમાં ચૂંટણી યોજવી જોઈએ. પાકિસ્તાનમાં છેલ્લી સામાન્ય ચૂંટણી જુલાઈ ૨૦૧૮માં યોજાઈ હતી. ઈમરાન ખાનની પાકિસ્તાન તહરીક-એ-ઈન્સાફ (પીટીઆઈ) પ્રાંતીય એસેમ્બલીની ચૂંટણી માટે દબાણ કરી રહી છે. પરંતુ સરકાર દેશભરમાં એક સાથે ચૂંટણી કરાવવાના તેના સ્ટેન્ડ પર અડગ છે.