પલવલ,હરિયાણાના પલવલમાં એક ખૂબ જ શરમજનક ઘટના સામે આવી છે. જેના માથે બળાત્કાર પીડિતાને ન્યાય અપાવવાની જવાબદારી છે તેણે તેની ઈજ્જત લૂંટી લીધી. પલવલમાં ગેંગરેપ પીડિત યુવતીએ હવે પોલીસના જ એક ASI એ તેના પર બળાત્કાર કર્યાનો આરોપ લગાવ્યો છે. આરોપ છે કે, પોલીસકર્મી તેને તપાસના બહાને ઘરેથી બોલાવી લેતો હતો અને હોટેલમાં લઈ જઈ તેના પર બળાત્કાર ગુજારતો હતો. આટલું જ નહીં, તે ગેંગરેપ પીડિત યુવતીને આનો વિરોધ કરશે તો તેને જાનથી મારી નાખવાની ધમકી પણ આપતો હતો.
પોલીસકર્મીએ કિશોરી પર ગેંગરેપના કેસમાં સંમતિ આપવા માટેનું દબાણ પણ કર્યું હતું. હવે પીડિતાએ મહિલા પોલીસ સ્ટેશનમાં એએસઆઇ વિરુદ્ધ બળાત્કાર સહિત અન્ય કલમો હેઠળ કેસ દાખલ કર્યો છે, જેની તપાસ કરવામાં આવી રહી છે.આ મામલે પલવલના એસપી રાજેશ દુગ્ગલે જણાવ્યું કે, હોડલ પોલીસ સ્ટેશન વિસ્તાર હેઠળના એક ગામની ૧૫ વર્ષની સગીર છોકરીએ પોલીસમાં ફરિયાદ નોંધાવી છે. યુવતીએ આરોપ લગાવ્યો છે કે, ૨૦૨૨માં તેણે મહિલા પોલીસ સ્ટેશનમાં અપહરણ કરીને બળાત્કારનો કેસ નોંધાવ્યો હતો, જેની તપાસ એએસઆઇ સુશીલા અને એએસઆઇ હંસરાજ કરી રહ્યા હતા. બંને તેને બાળ કલ્યાણ સમિતિ અને જિલ્લા સિવિલ હોસ્પિટલમાં મેડિકલ તપાસ માટે લઈ ગયા હતા અને કોર્ટમાં નિવેદન પણ નોંધ્યું હતું.એસપીએ કહ્યું કે અહીંથી એએસઆઇ હંસરાજ તેને સહી કરાવવાના બહાને હોટલના રૂમમાં લઈ ગયો અને તેની સાથે બળાત્કાર કર્યો. વિરોધ કરવા પર આરોપી પોલીસકર્મીએ યુવતીને ધમકી આપી કે, જો તે આ વિશે કોઈને કહેશે તો તે તેને જાનથી મારી નાંખશે. એવો પણ આરોપ છે કે, તે પછી આરોપી એએસઆઇ ગેંગરેપના આરોપીઓની સાથે મળીને તેના પર સમાધાન કરવા માટેનું દબાણ પણ કર્યું.
અધિકારીના જણાવ્યા મુજબ, ફરિયાદમાં પીડિતા વતી એવું પણ કહેવામાં આવ્યું હતું કે, આરોપીએ તેને ૧૭,૦૦૦ રૂપિયાનો ફોન પણ ખરીદીને આપ્યો હતો, જેથી તે ગેંગરેપ કેસમાં સમાધાન કરવા તૈયાર થઈ જાય.પીડિતાએ આ આખી વાત તેની માતાને જણાવી, ત્યારબાદ બંનેએ ડીએસપી અને પલવલ એસપીને ફરિયાદ કરી. મહિલા પોલીસ સ્ટેશને આ મામલે ગુનો નોંધી લીધો છે. એસપીએ કહ્યું છે કે, ફરિયાદના આધારે કેસ નોંધીને મામલાની ઊંડાણપૂર્વક તપાસ કરવામાં આવી રહી છે. તપાસમાં જો કોઈ દોષિત જણાશે તો તેની સામે કડક કાયદાકીય કાર્યવાહી કરવામાં આવશે.