મુંબઇ,
દેશ-વિદેશમાં પ્રખ્યાત દિગ્ગજ સંગીતકાર એ.આર. રહેમાને ઓસ્કાર એવોર્ડમાં ભારતીય ફિલ્મોને મળેલી સફળતા અંગે વાત કરતાં ચોંકાવનારા ખુલાસા કર્યા છે. તેમણે ભારત તરફથી ઓસ્કાર માટે મોકલવામાં આવતી ફિલ્મોની પસંદગી સામે નારાજગી નોંધાવી છે. ખરેખર જે ફિલ્મ જોઈને એવું લાગે કે, આ ફિલ્મ તો ઓસ્કારમાં જશે જ, તે ફિલ્મના બદલે અન્યને પસંદ કરવામાં આવે છે.
આ વખતના એકેડમી એવોર્ડ્સમાં ભારતની ત્રણ ફિલ્મો નોમિનેટ થઈ હતી. જેમાં એલિફન્ટ વ્હિસ્પર્સ, ઇઇઇ અને ઓલ ધ બ્રીથીસનો સમાવેશ થાય છે. તેમાંથી બે ફિલ્મોને એવોર્ડ મળ્યા છે. અગાઉ એકેડમી એવોર્ડ અને ગ્રેમી મેળવનારા રહેમાને સંગીતકાર એલ. સુબ્રમણિયમ સાથે વાતચીત દરમિયા પોતાની નારાજગી વ્યક્ત કરી હતી. તેમમે જણાવ્યું હતું કે, કેટલીક વખત મને જે ફિલ્મો જોઈને લાગે કે, તે ઓસ્કારમાં જશે. તેને મોકલવામાં આવતી નથી. ઓસ્કાર માટે ખોટી ફિલ્મો મોકલવામાં આવે છે. આપણે બીજી વ્યક્તિની નજરથી વિચારવું જોઈએ. પશ્ર્ચિમી દેશોમાં જવું હોય તો તેમની દૃષ્ટિથી જોવું જોઈએ.
મ્યૂઝિક ઈન્ડસ્ટ્રીમાં પોતાની સફર અંગે વાત કરતાં તેમણે કહ્યું હતું કે, ટેકનોલોજિકલ ફેરફાર આવી રહ્યા હતા તેવા સંક્રાંતિકાળમાં શરૂઆત કરી હતી. પ્રયોગો માટે ખૂબ સમય મળ્યો અને તેમાં નિષ્ફળ પણ જવાયું. મારી નિષ્ફળતા વિષે કોઈ જાણતું નથી અને લોકોને માત્ર સફળતા જ દેખાય છે. કારણ કે, આ બધું સ્ટુડિયોની અંદર બનતું હોય છે. મારી પાસે હોમ સ્ટુડિયો હોવાના કારણે આ બધું કરવાની સ્વતંત્રતા મળી હતી. પશ્ર્ચિમી દેશોનું સંગીત સાંભળીને લાગતું હતું કે, તેમના કરતાં વધારે સારું પ્રોડક્શન, ડિસ્ટ્રિબ્યુશન અને માસ્ટરિંગ આપણે કેમ ના કરી શકીએ? હજુ પણ આ જ દિશામાં મારા પ્રયત્ન ચાલુ હોય છે.