દાહોદ,
દાહોદ જિલ્લામાં સાયક્લોનિક સર્ક્યુલેશનની અસરના કારણે વાતાવરણમાં પલટો આવતા દાહોદ શહેર ઉપરાંત તાલુકાના આસપાસના વિવિધ તાલુકા મથકો ઉપર ગાજવીજ સાથે વરસાદ શરૂ થયો હતો. જેમાં ગરબાડા તાલુકાના ટૂંકીવજૂ ગામના કર્માસેલ કામાવીરા ફળીયામાં વરસાદી માહોલ વચ્ચે એક કાચા મકાન પર આકાશી વીજળી પડી હતી. તે સમયે મકાનનું છાપરૂં તોડી પતિ પત્ની તેમજ સસરા પર આ આકાશી વીજળી પડતા સસરાનું મોત થયાનું જાણવા મળ્યું હતું. જ્યારે પતિ પત્નીને ગંભીર ઇજાઓ પહોંચી હતી. કડાકા ભડાકા સાથે વીજળી પડતા આસપાસના લોકો ઘટના સ્થળે દોડી આવ્યા હતા અને વીજળી પડવાના કારણે ઇજાગ્રસ્ત પતિ પત્નીને સારવાર અર્થે દાહોદના ઝાયડસ હોસ્પિટલ મા ખસેડાયા હતા. જ્યારે મરણ વ્યક્તિને પીએમ અર્થે મડદા ઘરમાં ખસેડાયો હતો.