ન્યૂયોર્ક,
અમેરિકાના વિદેશ વિભાગના પ્રવક્તા નેડ પ્રાઈસ ટૂંક સમયમાં પોતાનું પદ છોડી દેશે. વિદેશ મંત્રી એન્ટની બ્લિક્ધન દ્વારા કરવામાં આવેલી નવી જાહેરાત પ્રમાણે ભારતીય-અમેરિકી વેદાંત પટેલ હવે વચગાળાના પ્રવક્તાનો ચાર્જ સંભાળશે. પટેલ હાલમાં ઉપ પ્રવક્તા તરીકે કામ કરી રહ્યા છે. ટ્રમ્પ પ્રશાસન દરમિયાન વિભાગની દૈનિક પ્રેસ બ્રીફિંગ શરૂ કરવા માટે બ્લિક્ધને પ્રાઈસના વખાણ પણ કર્યા હતા. બ્લિક્ધને કહ્યું કે કાર્યભાર સંભાળ્યા પછી પ્રાઈસે ૨૦૦થી વધારે પ્રેસ બ્રીફિંગ કર્યુ અને આ દરમિયાન તેમણે સંવાદદાતાઓની સાથે સાથે પોતાના સહકર્મચારીઓ અને દરેકની સાથે સન્માનજનક વ્યવહાર કર્યો. બાઈડેન પ્રશાસને હજુ સુધી નેડ પ્રાઈસની જગ્યાએ બીજા કોઈના નામની જાહેરાત કરી નથી. જોકે વેદાંત પટેલને વચગાળાના પ્રવક્તાનો ચાર્જ સોંપ્યો છે. પટેલને ગયા વર્ષે સપ્ટેમ્બર મહિનામાં જ બાઈડેન પ્રશાસને મહત્વની જવાબદારી સોંપતા ઉપ પ્રવક્તા બનાવ્યા હતા. ગુજરાતમાં જન્મેલા વેદાંત પટેલનો ભારત સાથેનો ગાઢ નાતો છે. ૩૩ વર્ષના ભારતીય-અમેરિકી વેદાંત પટેલનો જન્મ ગુજરાતમાં થયો છે. તેમણે કેલિફોર્નિયા યુનિવર્સિટી, રિવરસાઈડથી ગ્રેજ્યુએશન કર્યુ છે. પટેલ અનેક રાજકીય અભિયાનો પર પણ કામ કરી ચૂક્યા છે. વ્હાઈટ હાઉસમાં અનેક મહત્વની જવાબદારી નિભાવી ચૂક્યા છે. વેદાંત પટેલે અમેરિકાના રાષ્ટ્રપતિ જો બાઈડેનના સહાયક પ્રેસ સેક્રેટરી અને પ્રવક્તાના રૂપમાં કામ કર્યુ હતું. જ્યાં તેમણે શાનદાર મીડિયા સંબંધો અને કમ્યુનિકેશન સ્ટ્રેટેજી મેનેજમેન્ટથી બાઈડેન પ્રશાસનમાં પોતાની એક મહત્વની જગ્યા બનાવી. પટેલને વિવિધ રાજકીય અભિયાનો પર કામ કરવાનો અનુભવ છે. તેમણે કોંગ્રેસી માઈક હોન્ડા અને કોંગ્રેસ વૂમન પ્રમિલા જયપાલ માટે કામ કર્યુ છે. અહીંયા તેમણે કમ્યનિકેશન ડાયરેક્ટર તરીકે કામ કર્યુ. તેમની પાસે અધિકારીઓ અને રાજકીય ઉમેદવારોની સાર્વજનિક છબિને શાનદાર બનાવવાનો અનુભવ છે. અને તેના જ કારણે તે આજની તારીખમાં ડેમોક્રેટિક પાર્ટી માટે એક મહત્વનો ચહેરો બની ગયા છે. પોતાની નિયુક્તિની જાહેરાત પછી પટેલે ટ્વીટ કર્યુ કે હંમેશા નેડ પ્રાઈસની છત્રછાયામાં રહ્યો છું. તેમની વાકપટુતા, તેમનું ઉદાર વ્યક્તિત્વ, વિદેશ નીતિની ઉંડી સમજ, વિદેશ વિભાગ અને ટીમ પ્રત્યે તેમની જબરદસ્ત વફાદારી માટે ધન્યવાદ. તેમની સાથે શાનદાર સમય પસાર કર્યો છે. અને ખુશી આ વાતની છે કે તે બહુ જઈ રહ્યા નથી.