પાલનપુર,
પાલનપુરના ગઢ ગામમાં ધુળેટીના દિવસે ઇકોના ચાલકે ગાડીને રિવર્સ લેતી વખતે એક યુવકને કચડી નાખ્યો હતો. ઇકો ચાલાક અકસ્માત સર્જી વાહન મૂકી ફરાર થઈ ગયો હતો. આ અકસ્માતમાં યુવકને ગંભીરઈજા પહોંચતા સ્થાનિક લોકોની મદદથી સારવાર અર્થ નજીકની હોસ્પિટલમાં ખસેડવામાં આવ્યો હતો. જ્યા સારવાર દરમિયાન તેનું મોત થયું હતું.
પાલનપુર તાલુકાના ગઢ ગામે ધુળેટીના દિવસે કેટલાક મિત્રો ઉજવણી કરી રહ્યા હતા. આ સમય દરમિયાન એક ઇકો ચાલકે ગાડી રિવર્સ મારતી વખતે સ્ટેરીંગ પરનો કાબુ ગુમાવતા પાછળ ઉભેલા એક યુવકને કચડી નાખ્યો હતો. ઈકો ગાડીના ચાલકે યુવકને ટક્કર માર્યા બાદ ગાડી ભોય તળિયામાં ઉતરી ગઈ હતી. જોકે, આ અકસ્માતમાં શોપિંગ સ્ટોર પાસે ઉભેલા કેટલાક શખ્સોનો આબાદ બચાવ થયો હતો. જ્યારે ઇકો ગાડીની ટક્કરથી એક યુવક ગંભીર રીતે ઘાયલ થયો હતો. જેને સ્થાનિકોએ સારવાર અર્થ નજીકની હોસ્પિટલમાં ખસેડ્યો હતો. જે બાદ વધુ સારવાર માટે પાલનપુરની હોસ્પિટલમાં ખસેડવામાં આવ્યો હતો. જ્યા સારવાર દરમિયાન યુવકનું મોત થયું હતું. આ અકસ્માત બાદ ઈકો ગાડીનો ચાલક ફરાર થઈ ગયો હતો. જેથી સમગ્ર મામલે ગઢ પોલીસે ઇકો ચાલક વિરૂદ્ધ ફરિયાદ નોંધી આગળની તપાસ હાથ ધરી છે. આ સમગ્ર ઘટના સીસીટીવીમાં પણ કેદ થઈ હતી.