- ૨,૦૦૦ ચોરસ ફૂટના વિલા પર ૬ કરોડ રૂપિયા ખર્ચ્યા, મિલક્ત પર સ્ટેમ્પ ડ્યુટી તરીકે રૂ. ૩૬ લાખ ચૂકવ્યા.
અલીબાગ,
ભારતના બેટિંગ સ્ટાર વિરાટ કોહલીએ તાજેતરમાં અલીબાગના આવાસ ગામમાં એક લક્ઝરી બંગલો ખરીદ્યો છે. વિરાટ કોહલી હાલમાં બોર્ડર-ગાવસ્કર ટ્રોફીમાં વ્યસ્ત છે, જે ભારત અને ઓસ્ટ્રેલિયા વચ્ચે ચાલી રહેલી ૪ ટેસ્ટ મેચની શ્રેણી છે. આવી સ્થિતિમાં અલીબાગમાં બંગલો ખરીદવાની તમામ ઔપચારિક્તા તેમના મોટા ભાઈ વિકાસ કોહલીએ પૂરી કરી લીધી છે. વિરાટ અને અનુષ્કા અલીબાગમાં પ્રથમ મિલક્તના માલિક નથી. આ કપલે ગયા વર્ષે સપ્ટેમ્બરમાં અલીબાગમાં ૧૯.૨૪ કરોડ રૂપિયામાં ફાર્મહાઉસ પણ ખરીદ્યું હતું. તેણે રૂ. ૧.૧૫ કરોડની સ્ટેમ્પ ડ્યુટી ચૂકવી હોવાનું કહેવાય છે.
એક અહેવાલ મુજબ વિરાટ કોહલીએ આવાસ ગામમાં ૨,૦૦૦ ચોરસ ફૂટના વિલા પર ૬ કરોડ રૂપિયા ખર્ચ્યા છે. તેમણે આ મિલક્ત પર સ્ટેમ્પ ડ્યુટી તરીકે રૂ. ૩૬ લાખ ચૂકવ્યા છે. કહેવામાં આવી રહ્યું છે કે આ વિલામાં ૪૦૦ સ્ક્વેર ફૂટનો સ્વિમિંગ પૂલ પણ સામેલ છે. બોલિવૂડ એક્ટર સંજય ખાનની પુત્રી અને રિતિક રોશનની પૂર્વ પત્ની સુઝાન ખાને પ્રોજેક્ટનું ઈન્ટિરિયર ડિઝાઈન કર્યું છે. એડવોકેટ મહેશ મ્હાત્રે આવાસ લિવિંગ અલીબાગ એલએલપીના કાનૂની સલાહકાર તરીકે કામ કરે છે. તેણે કહ્યું હતું, આવાસ તેની પ્રાકૃતિક સુંદરતાના કારણે સેલિબ્રિટીઝનું મનપસંદ સ્થળ છે. ઉપરાંત, માંડવા જેટી આવાસથી પાંચ મિનિટના અંતરે છે અને સ્પીડ બોટ્સે હવે મુંબઈનું અંતર ઘટાડીને માત્ર ૧૫ મિનિટ કરી દીધું છે.
અહેવાલ મુજબ, અલીબાગમાં જમીનની સરેરાશ કિંમતો પ્રતિ ચોરસ ફૂટ રૂ. ૩,૦૦૦ થી રૂ. ૩,૫૦૦ની આસપાસ છે અને તે ચુનંદા વર્ગ માટે એક પ્રિય સપ્તાહાંતનું સ્થળ પણ છે. તમને જણાવી દઈએ કે માત્ર વિરાટ કોહલી જ નહીં પરંતુ ભારતીય ક્રિકેટ ટીમના વર્તમાન કેપ્ટન રોહિત શર્માએ પણ અલીબાગમાં જમીન ખરીદી છે. રોહિત શર્માએ ૨૦૨૧માં મહત્રોલી ગામમાં ચાર એકર જમીન ખરીદી હતી.
બીજી તરફ, ભારતે શ્રેણીની પ્રથમ બે મેચમાં ઓસ્ટ્રેલિયાને હરાવીને બોર્ડર-ગાવસ્કર ટ્રોફી જાળવી રાખી હતી. ભારતે માત્ર ત્રણ દિવસમાં નાગપુર અને દિલ્હી બંને ટેસ્ટ જીતી લીધી હતી. જો ભારત ઓસ્ટ્રેલિયા સામે વધુ એક શ્રેણી જીતે છે, તો તે ICC વર્લ્ડ ટેસ્ટ ચેમ્પિયનશિપની ફાઇનલમાં પોતાનું સ્થાન નિશ્ર્ચિત કરી લેશે.
જો કે કોહલી અત્યાર સુધી આ સિરીઝમાં મોટો સ્કોર કરી શક્યો નથી. કોહલીએ ત્રણ ઇનિંગ્સમાં ૭૬ રન બનાવ્યા છે. આ સાથે જ રોહિત શર્માએ શ્રેણીની પ્રથમ મેચમાં મેચ વિનિંગ સદી ફટકારી હતી. તેણે અત્યાર સુધી બે મેચમાં ૧૮૩ રન બનાવ્યા છે અને તે સિરીઝમાં અત્યાર સુધીમાં સૌથી વધુ રન બનાવનાર બેટ્સમેન છે.