નવીદિલ્હી,
ઈડી (એન્ફોર્સમેન્ટ ડિરેક્ટરેટ)એ ગઈ કાલે જણાવ્યું હતું કે શારદા મની લૉન્ડરિંગ કેસમાં કૉન્ગ્રેસના નેતા પી. ચિદમ્બરમનાં પત્ની નલિની ચિદમ્બરમ, સીપીએમના ભૂતપૂર્વ વિધાનસભ્ય દેબેન્દ્રનાથ બિસ્વાસ જેવા ‘લાભાર્થીઓ’ની ૬ કરોડ રૂપિયાથી વધુની સંપત્તિને એણે ટાંચમાં લીધી છે. પ્રિવેન્શન ઑફ મની લૉન્ડરિંગ ઍક્ટ હેઠળ ૩.૩ કરોડ રૂપિયાના મૂલ્યની જંગમ મિલક્તો તેમ જ ત્રણ કરોડ રૂપિયાની સ્થાવર મિલક્તો ટાંચમાં લેવા માટે ઑર્ડર અપાયો છે.
ડીજીસીએ (ડિરેક્ટરેટ જનરલ ઑફ સિવિલ એવિયેશન)એ એક પૅસેન્જર ખોટા ડેસ્ટિનેશન પર પહોંચવાની ઘટનાની તપાસનો આદેશ આપ્યો હતો. આ પૅસેન્જરે ઇન્ડિગોની ફ્લાઈટમાં પટના પહોંચવાનું હતું. જોકે એને બદલે તે આ ઍરલાઇનની બેદરકારીને કારણે અન્ય ફ્લાઈટમાં ઉદયપુર પહોંચી ગયો હતો. ડીજીસીએના અધિકારીએ જણાવ્યું હતું કે અફસર હુસૈન નામનો આ પૅસેન્જર તેની શેડ્યુલ્ડ ફ્લાઈટ પકડવા માટે ૩૦મી જાન્યુઆરીએ દિલ્હી ઍરપોર્ટ પર પહોંચ્યો હતો. જોકે ઉદયપુર ઍરપોર્ટ પર લૅન્ડ થયા બાદ તે ખોટા ડેસ્ટિનેશન પર પહોંચ્યો હોવાનો તેને ખ્યાલ આવ્યો હતો.