શ્રીનગર,
અંતિમ તબક્કામાં પ્રવેશેલી કોંગ્રેસના નેતા રાહુલ ગાંધીની ભારત જોડો યાત્રા હાલ જમ્મુ-કાશ્મીરમાં પહોંચી છે. જમ્મુ-કાશ્મીરમાં કોંગ્રેસ તરફથી મોટા મુદ્દા ઉઠાવવામાં આવી રહ્યા છે. આ દરમિયાન રાહુલ ગાંધીએ જમ્મુ-કાશ્મીરના લોકો પૂર્ણ રાજ્યનો દરજ્જો અપાવવાની વાત કરી છે. જમ્મુના સતવારીમાં એક જાહેરસભા સંબોધિત કરતા વખતી રાહુલ ગાંધીએ કહ્યું કે આ સમયે સૌથી મોટો મુદ્દો સ્ટેટહુડનો છે, આનાથી મોટો કોઈ બીજો મુદ્દો નથી.
રાહુલ ગાંધીએ કેન્દ્ર સરકાર પર નિશાન તાકીને કહ્યું કે તમારો હક એ લોકોએ છીનવી લીધો છે. કોંગ્રેસ પાર્ટી તમને સંપૂર્ણ સમર્થન આપશે. આ સાથે રાહુલ ગાંધીએ સ્પષ્ટ રીતે કહ્યું કે જમ્મુ-કાશ્મીરને પૂર્ણ રાજ્યનો દરજજો અપાવવામાં અમે સંપૂર્ણ શક્તિ કામે લગાડીશું. કેન્દ્રની ભાજપ સરકાર પર નિશાન તાકીને કોંગ્રેસ નેતા રાહુલ ગાંધીએ કહ્યું કે હકીક્ત એ છે કે દેશને રોજગારી ફક્ત નાના વેપારીઓ અને લઘુ-મધ્યમ ઉદ્યોગ જ આપી શકે છે, દેશના બે-ત્રણ મોટા ઉદ્યોગપતિ નહીં, એટલા માટે ભારતમાં બેરોજગારી ફેલાઈ રહી છે.
હાલમાં ભારત જોડો યાત્રા અંતર્ગત સમગ્ર દેશનું પરિભ્રમણ કરી રહેલા કોંગ્રેસના નેતા રાહુલ ગાંધી દેશના મોસ્ટ એલિજિબલ બેચલર્સમાં સ્થાન ધરાવે છે. તાજેતરમાં એક યુટ્યૂબ ચેનલે આપેલી એક મુલાકાતમાં રાહુલ ગાંધીએ પોતાના વ્યક્તિગત જીવન વિશે કેટલીક બાબતો જણાવી હતી. જેમાં તેમણે ભોજનથી લઈને જીવનસાથીની પસંદગી અંગેના પ્રશ્ર્નોના જવાબ આપ્યાં હતાં. લગ્ન અંગેના એક સવાલના જવાબમાં તેમણે જણાવ્યું હતું કે હું લગ્નનો વિરોધી નથી. તેમણે કહ્યું હતું કે મારા માબાપનું લગ્નજીવન અત્યંત સુખદ હતું. હું પણ તેમની જેમ ખુશહાલ લગ્નજીવન ઈચ્છું છું. આવી યુવતી મળશે તો હું તરત જ લગ્ન માટે હા પાડી દઈશ. જીવનસાથીની પસંદગી અંગે તેમણે જણાવ્યું હતું કે તેમને પ્રેમાળ અને સમજદાર યુવતી પસંદ છે.