નવીદિલ્હી,
વડાપ્રધાન નરેન્દ્ર મોદીએ ભારતના ચીફ જસ્ટિસ ડી વાય ચંદ્રચૂડની પ્રશંસા કરી છે. સુપ્રીમ કોર્ટના ચુકાદાને પ્રાદેશિક ભાષામાં ઉપલબ્ધ કરાવવાની દિશામાં કામ કરવાની જસ્ટિસ ચંદ્રચૂડે કરેલી હિમાયતની પીએમ મોદીએ પણ તરફેણ કરી છે. આને પ્રશંસનીય વિચાર ગણાવતાં મોદીએ કહ્યું હતું કે આનાથી અનેક લોકો એમાં પણ ખાસકરીને યુવાઓને મદદ મળશે.
મુંબઇમાં એક લેક્ચરમાં સીજેઆઇ ચંદ્રચૂડે કહ્યું હતું કે ટેક્નોલોજીનો ઉપયોગ કરીને તમામ ચુકાદાને પ્રાદેશિક ભાષામાં ઉપલબ્ધ કરાવવા જોઇએ. મોદીએ તેમની પ્રશંસા કરતા ટ્વિટ પણ શેર કર્યા છે. તેમાં જસ્ટિસ ચંદ્રચૂડના એક વ્યાખ્યાનની ક્લિપને પણ શેર કરવામાં આવી છે. આ ક્લિપમાં સીજેઆઇ સુપ્રીમના ચુકાદાને પ્રાદેશિક ભાષામાં ઉપલબ્ધ કરાવવાની દિશામાં ભાર મુકવાની વાત કરતા દેખાય છે. પીએમ મોદીએ કહ્યું કે ભારતમાં અનેક ભાષા છે. આ અમારી સાંસ્કૃતિક જીવંતતાને જોડે છે. કેન્દ્રસરકાર ભારતીય ભાષાઓને પ્રોત્સાહિત કરવા માટે અનેક પ્રયાસ કરી રહી છે. આમાં એન્જીનીયરિંગ અને મેડિસિન જેવા વિષયોને માતૃભાષામાં વાંચવાનો વિકલ્પ આપવો પણ સામેલ છે. ચીફ જસ્ટિસે ચુકાદાના તમામ ભારતીય ભાષામાં અનુવાદ માટે આર્ટિફિશ્યલ ઇન્ટેલિજન્સ (એઆઇ)ના ઉપયોગનો સંકેત આપ્યો હતો. જાણવાની વાત એ છે કે સપ્ટેમ્બર ૨૦૨૨માં જસ્ટિસ ચંદ્રચૂડના નેતૃત્વમાં સુપ્રીમ કોર્ટે પોતાની બંધારણીય બેન્ચની સુનાવણીનું સીધુ પ્રસારણ શરૂ કર્યું હતું. તેઓ બોલ્યા હતા કે ટેક્નોલોજી થકી માહિતી સુધી પહોંચના અવરોધને દૂર કરવાનો વિચાર છે. અંગ્રેજીમાં કેટલાક લખાણો ગ્રામ્યના વકીલોને મદદરૂપ થતી નથી. આમ હવે આગામી પગલું તમામ ભારતીય ભાષામાં ચુકાદાની અનુવાદ કરાયેલી પ્રતિઓ આપવાનું છે.