મુંબઇ,
સાઉથની ફિલ્મ આરઆરઆર વિદેશની ધરતી પર ધૂમ મચાવી રહી છે. ફિલ્મને સાઉથ બાદ બોલિવૂડમાં સારો પ્રતિસાદ મળ્યો હતો અને હવે આ ફિલ્મ વિદેશોમાં પણ કમાલ બતાવી રહી છે. નિર્દેશક એસએસ રાજામૌલીની ફિલ્મ આરઆરઆરએ ૩ ઇન્ટરનેશનલ એવોર્ડ જીત્યા છે. આરઆરઆરએ ફિલાડેલ્ફિયા ફિલ્મ ક્રિટીક્સ સર્કલ એન્યુઅલ એવોર્ડ્સમાં ૩ એવોર્ડ જીત્યા છે. આરઆરઆરએ ત્રણ કેટેગરીમાં ત્રણ એવોર્ડ જીત્યા છે શ્રેષ્ઠ વિદેશી ભાષાની ફિલ્મ, શ્રેષ્ઠ સિનેમેટોગ્રાફી અને શ્રેષ્ઠ સ્કોર/સાઉન્ડટ્રેક.
આરઆરઆરએ તેના ઓફિશિયલ ટ્વિટર પરથી એક ટ્વીટમાં આ માહિતી આપી છે અને લખ્યું છે- “અમને ૩ ટ્રોફી સાથે એનાયત કરવા બદલ તમારો આભાર”. ફિલ્મની આ સફળતા બાદ ઘણા ચાહકોએ અભિનંદન પાઠવ્યા છે.
આરઆરઆરને સમગ્ર વિશ્ર્વમાં સફળતા અને પ્રેમ મળી રહ્યો છે. આ ફિલ્મે અત્યાર સુધીમાં ૧,૨૦૦ કરોડની કમાણી કરી લીધી છે. આ સાથે વિદેશમાં પણ ફિલ્મનો દબદબો રહ્યો છે. RRR એ ૧૯૨૦ના દાયકા પર આધારિત ઐતિહાસિક ફિલ્મ છે. ફિલ્મમાં સાઉથ એક્ટર રામ ચરણ અને જુનિયર એનટીઆર લીડ રોલમાં છે. આ સિવાય આલિયા ભટ્ટ અને અજય દેવગન પણ મહત્વના રોલમાં છે. આરઆરઆર વિશ્ર્વભરમાં માર્ચમાં તેલુગુ, તમિલ, કન્નડ, મલયાલમ અને હિન્દીમાં રિલીઝ કરવામાં આવ્યું હતું.
આ ફિલ્મે તાજેતરમાં ૨૮મા વાષક ક્રિટિક્સ ચોઈસ એવોર્ડ્સમાં પાંચ નોમિનેશન મેળવ્યા હતા, જેમાં બેસ્ટ પિક્ચર, બેસ્ટ ડિરેક્ટર, બેસ્ટ ફોરેન લેંગ્વેજ ફિલ્મ, બેસ્ટ સોંગ અને બેસ્ટ સ્પેશિયલ ઈફેક્ટ્સનો સમાવેશ થાય છે.આરઆરઆરએ ૨ ગોલ્ડન ગ્લોબ નોમિનેશન પણ મેળવ્યા છે. વિશ્ર્વની ટોચની ૫૦ ફિલ્મોની યાદીમાં RRR નવમા નંબરે છે. સાઉથની આ ફિલ્મને દર્શકોનો ઘણો પ્રેમ મળી રહ્યો છે.