ગોધરા શહેરના ભિલોડિયા પ્લોટ વિસ્તારમાં પોલીસે ગેરકાયદેસર ગેસ રિફિલિંગનું મોટું કૌભાંડ ઝડપી પાડ્યું છે. બી ડિવિઝન પોલીસને મળેલી બાતમીના આધારે ઇસ્માઇલ મસ્જિદ પાછળ આવેલી એક દુકાનમાં દરોડો પાડવામાં આવ્યો હતો. દરોડા દરમિયાન એક મોટા સિલિન્ડરમાંથી નાના સિલિન્ડરમાં ગેરકાયદેસર રીતે એલપીજી ગેસ ટ્રાન્સફર કરવામાં આવી રહ્યો હોવાનું જણાયું હતું.
પોલીસ તપાસમાં આ પ્રવૃત્તિ માટે કોઈ કાયદેસરની પરવાનગી મેળવવામાં આવી ન હોવાનું સામે આવ્યું છે. પોલીસે સ્થળ પરથી રૂ. 1.48 લાખની કિંમતના 41 ગેસ સિલિન્ડર અને ઇલેક્ટ્રિક મોટર સહિત કુલ રૂ. 1.56 લાખનો મુદ્દામાલ જપ્ત કર્યો છે. આ ગેરકાયદેસર પ્રવૃત્તિ ચલાવનાર શબ્બીર અબ્દુલરજ્જાક જુજારાની ધરપકડ કરી ગોધરા શહેર બી ડિવિઝન પોલીસ સ્ટેશનમાં ગુનો નોંધવામાં આવ્યો છે.
આ પ્રકારની ગેરકાયદેસર પ્રવૃત્તિથી માત્ર કાયદાનું ઉલ્લંઘન જ નહીં, પરંતુ નાગરિકોની સુરક્ષા પણ જોખમમાં મૂકાય છે. અનધિકૃત ગેસ રિફિલિંગથી વિસ્ફોટ થવાનું જોખમ રહે છે, જે આસપાસના રહેવાસીઓ માટે ખતરારૂપ બની શકે છે.