મેરઠમાં શિવ મહાપુરાણની કથામાં દોડાદોડી:અનેક મહિલાઓ-વૃદ્ધો દટાયા, બાઉન્સર્સ સાથે બોલાચાલીમાં મામલો બિચક્યો

મેરઠમાં શુક્રવારે બપોરે પંડિત પ્રદીપ મિશ્રાની શિવ મહાપુરાણની કથામાં ભાગદોડ મચી ગઈ હતી. અનેક મહિલાઓ-વૃદ્ધો ભાગદોડમાં નીચે પડ્યા અને દટાયા હતા. આજે કથાનો છઠ્ઠો દિવસ છે અને આવતીકાલે છેલ્લો દિવસ છે. કથાનો પ્રારંભ બપોરે 1 વાગે થયો હતો.લગભગ 1 લાખ લોકો કથા સાંભળવા માટે પહોંચ્યા હતા. કથા શરૂ થઈ ત્યારે લોકો ઉતાવળમાં અંદર જઈ રહ્યા હતા. ભીડ અચાનક વધી જતાં બાઉન્સરોએ લોકોને પ્રવેશતા અટકાવ્યા હતા અને પછી દોડાદોડી થઈ હતી.શતાબ્દી નગરમાં ચાલી રહેલી આ કથામાં દરરોજ લગભગ 1.5 લાખ લોકો આવી રહ્યા છે. કથા દરમિયાન અનેક VVIP પણ મેરઠ પહોંચી રહ્યા છે.

પ્રવેશ અંગે બાઉન્સરો સાથે ઝઘડો થયો

કથામાં મુખ્ય યજમાન પણ એજ માર્ગ પરથી જતા હતા જે માર્ગથી ભીડ આવતી હતી. ત્યાર બાદ પ્રવેશ બાબતે ઝઘડો થયો હતો. એન્ટ્રી ગેટ પર બાઉન્સરોએ મહિલાઓને અંદર જતા અટકાવી હતી. પાછળથી ટોળું આગળ વધવા દબાણ કરતું રહ્યું. દરમિયાન 15-20 મહિલાઓ એક પછી એક પડી ગઈ હતી.

એક જ દિવસમાં બે વખત દોડાદોડી થઈ

કહેવામાં આવી રહ્યું છે કે, કથા દરમિયાન શુક્રવારે બે વખત દોડાદોડી મચી ગઈ હતી. સૌથી પહેલા સવારે 9.30 વાગ્યે દોડાદોડી મચી હતી. આ દરમિયાન VIP પાસ માટે લોકો એકઠા થયા હતા, પરંતુ તે શાંત થઈ ગયા હતા. આ પછી બપોરે 1 વાગ્યે ફરીથી દોડાદોડી મચી ગઈ હતી.

કથા સ્થળે 1000 પોલીસકર્મીઓ, ડ્રોન દ્વારા દેખરેખ

• શ્રી કેદારેશ્વર સેવા સમિતિ, મેરઠ વતી શતાબ્દીનગરમાં 15મી ડિસેમ્બરથી 21મી ડિસેમ્બર સુધી શિવ મહાપુરાણની કથા ચાલી રહી છે.
• સિહોરના કથાકાર પં. પ્રદીપ મિશ્રા પ્રવચન આપી રહ્યા છે. કથાનો સમય બપોરે 1 થી 4 છે.
• અહીં 7 પાર્કિંગ લોટ બનાવવામાં આવ્યા છે. 1000 પોલીસકર્મીઓ ફરજ પર મુકાયા છે.
• અહીં એક મીની હોસ્પિટલ, સ્વચ્છ પાણી, ભોજન અને અન્ય સુવિધાઓ છે.
• કથા પંડાલ અને તેની આસપાસ 5 હજાર સીસીટીવી લગાવવામાં આવ્યા છે. ડ્રોન દ્વારા પણ દરેક ગતિવિધિ પર નજર રાખવામાં આવી રહી છે.

ભારે વાહનોને પણ ડાયવર્ટ કરવામાં આવ્યા હતા એસપી ટ્રાફિક રાઘવેન્દ્ર મિશ્રાએ કહ્યું- શિવ મહાપુરાણ કથામાં ભક્તોની ભીડને કારણે ટ્રાફિક ડાયવર્ટ કરવામાં આવ્યો હતો. 15 થી 21 ડિસેમ્બર સુધી શોપ્રિક્સ મોલથી પરતાપુર ઇન્ટરચેન્જ સુધી ભારે વાહનો પર પ્રતિબંધ મૂકવામાં આવ્યો છે. સવારે 8 થી રાત્રે 8 વાગ્યા સુધી ડાયવર્ઝન કરવામાં આવ્યું છે.

હાપુડથી આવતા ભારે વાહનો ખારખોડા તિરાહાથી મોહિઉદ્દીનપુર થઈને ટ્રાન્સપોર્ટ નગર થઈને દિલ્હી-દહેરાદૂન હાઈવે થઈને બાગપત રોડ ફ્લાયઓવર નીચે જઈ રહ્યા છે. ટ્રાન્સપોર્ટ નગર અને શહેરમાંથી આવતા ભારે વાહનોને શોપ્રિક્સ મોલથી હાપુર રોડ થઈને બિજલી બંબા બાયપાસ તરફ લઈ જવામાં આવી રહ્યા છે.