તુર્કીની રાજધાની અંકારામાં એરોસ્પેસ અને ડિફેન્સ કંપની TUSAS પર બુધવારે આતંકી હુમલો કરવામાં આવ્યો હતો. આ હુમલામાં 4 લોકોનાં મોત અને 14 ઘાયલ થયા છે. આ હુમલો ભારતીય સમય અનુસાર સાંજે 6:30 વાગ્યે થયો હતો.
તુર્કીના ગૃહમંત્રી અલી યેર્લિકાયાએ X પર પોસ્ટ કર્યું છે કે આ હુમલો રાજધાની અંકારાથી 40 કિમી દૂર કહરામંકજાનમાં થયો હતો, જોકે હજુ સુધી એ સ્પષ્ટ થયું નથી કે આ હુમલા પાછળ કોનો હાથ હતો. હુમલાખોરો ટેક્સીમાં આવ્યા હતા. અહીં પહોંચ્યા પછી તેમણે બોમ્બબ્લાસ્ટ કર્યો અને ફાયરિંગ શરૂ કર્યું.
મીડિયા રિપોર્ટ્સ અનુસાર, ટેક્સીમાં કુલ 3 લોકો સવાર હતા. તેમની વચ્ચે એક મહિલા પણ હતી. તેમાંથી એક આત્મઘાતી બોમ્બર હતો, જેણે પોતાની જાતને બોમ્બથી ઉડાવી દીધી હતી. બાકીના 2 લોકોએ લોકો પર ગોળીબાર શરૂ કર્યો.હાલમાં સુરક્ષા દળો, એમ્બ્યુલન્સ અને ફાયરબ્રિગેડના જવાનોને ઘટનાસ્થળે મોકલવામાં આવ્યાં છે. સ્થાનિક મીડિયા અનુસાર, આ કંપનીમાં લગભગ 15 હજાર લોકો કામ કરે છે.