લેબનનમાં ઇઝરાયલના હુમલા વચ્ચે હિઝબુલ્લાએ સીઝફાયરની માગ કરી છે. CNNના અહેવાલ મુજબ, આ સંગઠને પહેલીવાર જાહેરમાં સીઝફાયરનું સમર્થન કર્યું છે અને ગાઝામાં યુદ્ધ રોકવાની કોઈ શરત રાખી નથી.હમાસને ટેકો આપતા હિઝબુલ્લાહએ ગયા વર્ષે 8 ઓક્ટોબરે ઈઝરાયલ પર હવાઈ હુમલા કર્યા હતા. હિઝબુલ્લાહના નાયબ ચીફ નઈમ કાસિમે મંગળવારે આ ઘટનાને એક વર્ષ પૂર્ણ થવા પર ભાષણ આપ્યું હતું.
કાસેમે કહ્યું કે હિઝબુલ્લાહ લેબનીઝ સંસદના સ્પીકર નબીહ બેરી દ્વારા યુદ્ધવિરામ માટેના પ્રયાસોને સમર્થન આપે છે. એકવાર યુદ્ધવિરામ થશે પછી અન્ય બાબતો પર ચર્ચા થશે. હિઝબુલ્લાહએ અગાઉ કહ્યું હતું કે તે ગાઝામાં યુદ્ધવિરામ થશે ત્યારે જ ઈઝરાયલ પર હુમલા બંધ કરશે.
ઈરાનના 39 સાંસદોએ પરમાણુ હથિયાર બનાવવાની માગ કરી
ઈરાનના 39 સાંસદોએ સુપ્રીમ નેશનલ સિક્યોરિટી કાઉન્સિલને પત્ર લખીને પરમાણુ હથિયાર બનાવવાની માગ કરી છે. અલજઝીરાના રિપોર્ટ અનુસાર, તેમાં કહેવામાં આવ્યું છે કે ઈરાનના સંરક્ષણ સિદ્ધાંતોમાં પરિવર્તનની જરૂર છે.પત્ર લખનારા સાંસદોમાંના એક અખલાઘીએ કહ્યું કે આજે વિશ્વના એક પણ આંતરરાષ્ટ્રીય સંગઠન, યુરોપિયન દેશ કે અમેરિકા પાસે ઇઝરાયલને રોકવાની તાકાત નથી. તેઓ ગમે તેટલો ગુનો કરવા માગે, તે કરી રહ્યા છે.ઈરાનના સર્વોચ્ચ નેતા આયાતુલ્લાહ અલી ખામેનીએ બે દાયકા પહેલા એક ધાર્મિક આદેશ જારી કર્યો હતો જેમાં જણાવ્યું હતું કે પરમાણુ શસ્ત્રો રાખવા એ ઈસ્લામ વિરુદ્ધ છે. જો કે ત્યારપછી ઈરાનમાં પરમાણુ હથિયાર બનાવવાની અનેક માંગણીઓ થઈ રહી છે.
ઇઝરાયલે ઘણા શરણાર્થી શિબિરો પર હુમલો કર્યો
લેબનનમાં સંયુક્ત રાષ્ટ્રની એજન્સી (UNRWA)એ કહ્યું કે ઇઝરાયલના હુમલાની અસર પેલેસ્ટિનિયન શરણાર્થી શિબિરો પર પડી છે. ઇઝરાયલી દળોએ સિડોન પ્રાંતમાં ઈન અલ-હિલવેહ કેમ્પ, ટાયરમાં અલ બાસ કેમ્પ અને ત્રિપોલીમાં બેદાવી કેમ્પને નિશાન બનાવ્યા હતા. ઇઝરાયલે ઓક્ટોબરની શરૂઆતમાં અહીં હુમલો કરવાનું શરૂ કર્યું હતું. જેના કારણે ઘણા શરણાર્થીઓને અન્ય સ્થળોએ જવું પડ્યું છે.