એક તરફ જ્યારે PM નરેન્દ્ર મોદી અમેરિકાના પ્રવાસે છે, ત્યારે બીજી બાજુ અમેરિકાના અલાબામાના બર્મિંગહામમાં ગોળીબારની ઘટના સામે આવી છે. જેમાં ચાર લોકોનાં મોત થયાં હોવાના અહેવાલ છે. આ ઘટના શનિવારે મોડી રાત્રે બની હોવાનું કહેવાય છે. પોલીસે જણાવ્યું કે અધિકારીઓએ ગોળીબારનો અહેવાલ નોંધ્યો છે.
બર્મિંગહામ પોલીસ વિભાગે X પર એક પોસ્ટમાં લખ્યું છે કે, “અધિકારીઓ એકથી વધુ ગોળીબારની ઘટના સ્થળ પર થઇ છે જેના પરિણામે ઘણી ઇજાઓ થઈ શકે છે.” પોસ્ટમાં કહેવાયું છે કે શૂટિંગ શહેરના ફાઈવ પોઈન્ટ સાઉથ વિસ્તારમાં થયું હતું. મીડિયા રિપોર્ટ્સ અનુસાર, ફાયરિંગમાં ઓછામાં ઓછા ચાર લોકો માર્યા ગયા છે અને ડઝનેક ઘાયલ થયા છે.
પ્રારંભિક અહેવાલો દર્શાવે છે કે જ્યારે ગોળી ચલાવવામાં આવી ત્યારે ક્લબના સમર્થકો મેગ્નોલિયા એવન્યુ પર હુક્કા અને સિગાર લાઉન્જની બહાર લાઇનમાં ઊભા હતા. પ્રત્યક્ષદર્શીઓએ જણાવ્યું કે ગોળીઓના અવાજથી એવું લાગી રહ્યું હતું કે જાણે તે ઓટોમેટિક ગન હોય જે સતત ફાયરિંગ કરી રહી હતી. અમેરિકી અધિકારીઓ માને છે કે ત્યાં ઘણા શૂટર્સ હતા અને તેઓએ કોઈની ધરપકડ કરી નથી.
બર્મિંગહામના ફાઈવ પોઈન્ટ્સ સાઉથ વિસ્તારમાં એક બારની બહાર કેટલાક હુમલાખોરોએ ગોળીબાર કરીને અરાજકતાનો માહોલ સર્જ્યો હતો. ફાયરિંગનો ભોગ બનેલા ત્રણનું ઘટનાસ્થળે જ મોત થયું હતું, જ્યારે ચોથાને હોસ્પિટલમાં મૃત જાહેર કરવામાં આવ્યો હતો.એબીસીના અહેવાલ મુજબ પોલીસને રાત્રે લગભગ 11 વાગ્યે ફાયરિંગની ઘટનાની માહિતી મળી હતી. પોલીસ ઘટનાસ્થળે પહોંચી અને ફાયરિંગમાં ઘાયલ થયેલા લોકોને હોસ્પિટલ લઈ ગયા.
અહેવાલો અનુસાર, આઠ ઘાયલ લોકોને ઘટનાસ્થળેથી બહાર કાઢવામાં આવ્યા હતા અને બર્મિંગહામની હોસ્પિટલમાં દાખલ કરવામાં આવ્યા હતા. તપાસકર્તાઓ માને છે કે ઘણા હુમલાખોરોએ મેગ્નોલિયા એવન્યુ પર લોકોના જૂથ પર આડેધડ ગોળી ચલાવી હતી. પોલીસનું કહેવું છે કે અમે જવાબદાર લોકોને શોધવા, ઓળખવા અને ધરપકડ કરવા માટે તમામ શક્ય પ્રયાસો કરીશું.