ગુજરાત હાઈકોર્ટે જણાવ્યું હતું કે રાજ્ય સરકારે જ્ઞાન અને સંશોધનના હેતુઓને અનુસરવા રાજ્યની જેલોમાં બંધ કેદીઓને ઈન્ટરનેટની મર્યાદિત ઍક્સેસ આપવાનું વિચારવું જોઈએ. જસ્ટિસ હસમુખ ડી સુથારે કહ્યું કે હવે સમય આવી ગયો છે કે જેલ સત્તાવાળાઓ ટેક્નોલોજીને અપનાવે અને જેલમાં ડિજિટલ વાતાવરણ બનાવે. કોર્ટ આસારામ બાપુના પુત્ર નારાયણસાઈ આસારામ હરપલાનીની અરજી પર સુનાવણી કરી રહી હતી, જેમાં બળાત્કારના આરોપી નારાયણસાઈએ જેલમાં લેપટોપ, આઈપેડ અને કોમ્પ્યુટરની અંગત સુવિધાઓ ઉપલબ્ધ કરાવવાની માંગ કરી હતી.
બાર એન્ડ બેંચના અહેવાલ મુજબ, કોર્ટે રાજ્ય સરકારને જેલમાં રહેલા આરોપીઓ અને દોષિતોના જ્ઞાનને સમૃદ્ધ બનાવવા અને સંશોધનના હેતુથી નિષ્ણાતોની સલાહ લેવા જણાવ્યું હતું. કોર્ટે કહ્યું કે ઇન્ટરનેટ એક્સેસને અસરકારક રીતે નિયંત્રિત કરવા અને વપરાશર્ક્તાઓ દ્વારા છેતરપિંડી અટકાવવા ફાયરવોલ અથવા અન્ય તકનીકનો ઉપયોગ કરીને મર્યાદિત ઇન્ટરનેટ ઍક્સેસ પ્રદાન કરવા માટે એસઓપી તૈયાર કરવા જોઈએ. એમ પણ કહ્યું કે દુરુપયોગના કિસ્સામાં આવી સુવિધાઓ બંધ કરવી જોઈએ.
જેલમાં લેપટોપ, આઈપેડ અને કોમ્પ્યુટરનો ઉપયોગ કરવાની પરવાનગી માંગતી બળાત્કારના દોષિત નારાયણસાઈની અરજીને ફગાવી દેતી વખતે કોર્ટે આ ટિપ્પણી કરી હતી. અરજીમાં એવી દલીલ કરવામાં આવી હતી કે બળાત્કારના ગુનેગાર આસારામ બાપુનો પુત્ર નારાયણસાઈ સારો લેખક છે. જેલમાં જતા પહેલા તેણે ૧૯ પુસ્તકો લખ્યા હતા. તેમની ધરપકડ પછી પણ તેમણે વધુ પાંચ પુસ્તકો પ્રકાશિત કર્યા. અરજીમાં એમ પણ કહેવામાં આવ્યું છે કે તેમની અને તેમના પરિવાર સામેના કેસના દસ્તાવેજો હજારો પાનાના છે. આવા કિસ્સામાં, તેઓ તેમના વકીલો સાથે વાતચીત કરી શકે તે માટે તેમને લેપટોપ અને ફોન પ્રદાન કરવો જોઈએ.
કોર્ટે કહ્યું કે વ્યક્તિગત મોબાઈલ અને અન્ય ઈલેક્ટ્રોનિક ઉપકરણોનો ઉપયોગ જેલ મેન્યુઅલ અને જેલ એક્ટનું ઉલ્લંઘન હશે. કોર્ટે કહ્યું કે એવી આશંકા છે કે જો નારાયણસાઈને મોબાઈલ અને ઈન્ટરનેટની સુવિધા આપવામાં આવે તો તે પોતાના અનુયાયીઓ અને બહારના લોકોનો સંપર્ક કરી શકે છે. તેનાથી જાહેર શાંતિ જોખમાઈ શકે છે. કોર્ટે નારાયણસાઈના જેલની અંદરના વર્તનની પણ નોંધ લીધી હતી. તેણે કહ્યું કે તેને મોબાઈલ ફોનનો ઉપયોગ કરવાની પરવાનગી આપવાથી રાષ્ટ્રીય સુરક્ષા પણ જોખમમાં આવી શકે છે.
કોર્ટના આદેશમાં કહેવામાં આવ્યું છે કે જ્યાં સુધી અરજદારની વાત છે તો તેની જેલની વર્તણૂક પણ સારી નથી. તે વારંવાર જેલમાં ગેરકાયદેસર રીતે મોબાઈલ ફોન રાખતો અને તેનો ઉપયોગ કરતો પકડાયો છે. આ માટે જેલમાં પણ ગુના નોંધાયા છે. છતાં તેણે જેલમાંથી ભૂખ હડતાળ બોલાવી અને કેદીઓને ઉશ્કેર્યા અને જાહેર શાંતિને ખલેલ પહોંચાડી. કોર્ટે એમ પણ કહ્યું કે નારાયણસાઈની રજાની અરજી સુપ્રીમ કોર્ટે ફગાવી દીધી છે. તેમજ જેલની અંદર તેના વર્તનને કારણે તેને આપવામાં આવતી સુવિધાઓ પણ સ્થગિત કરવામાં આવી હતી.
કોર્ટે કહ્યું કે અરજદારને મોબાઈલ ફોન, બેટરી અને તમાકુ જેવી અનધિકૃત વસ્તુઓ રાખવા માટે એક અલગ ઉચ્ચ સુરક્ષા સેલમાં રાખવામાં આવ્યો હતો. વધુમાં, તેમની કેન્ટીન સેવાઓ અને મુલાકાતના અધિકારો પણ એક મહિના માટે સસ્પેન્ડ કરવામાં આવ્યા હતા. અરજદારનું વર્તન તેની સ્વતંત્રતાનો દુરુપયોગ સૂચવે છે અને તેને જેલમાં લેપટોપ, કોમ્પ્યુટર અથવા આઈપેડ જેવી અંગત વસ્તુઓ રાખવાની મંજૂરી આપવાથી જાહેર શાંતિનો વધુ ભંગ થઈ શકે છે. આમ કોર્ટે તારણ કાઢ્યું કે ગેજેટનો ઉપયોગ કરવા માટે આવી પરવાનગી આપવા માટે કોઈ કેસ કરવામાં આવ્યો ન હતો. કોર્ટે અરજી ફગાવી દીધી હતી.સુનાવણી દરમિયાન અરજદાર વતી એડવોકેટ આશિષ એમ ડગલીએ દલીલો રજૂ કરી હતી, જ્યારે રાજ્ય સરકાર વતી સરકારી વકીલ હાદક અને અધિક સરકારી વકીલ એચ.કે.પટેલે કોર્ટમાં દલીલો રજૂ કરી હતી.