ગણેશ ચતુર્થી જેમ જેમ નજીક આવી રહી છે. તેમ તેમ વિવિધ શહેરોમાં ગણેશજીની આગમન યાત્રા યોજાઈ રહી છે. ત્યારે મહીસાગરના લુણાવાડામાં પણ દર વર્ષની જેમ આ વર્ષે પણ આનંદ ઉલ્લાસભેર બાપ્પાની અલગ અલગ ગણેશ મંડળો દ્વારા પધરામણી કરવામાં આવનાર છે. જેને લઈ ગણેશ મંડળો દ્વારા અત્યારથી જ તૈયારીઓ શરૂ કરી દેવામાં આવી છે.
શ્રી ગણેશ મંડળ ચેરીટેબલ ટ્રસ્ટ છપૈયા ધામ સોસાયટી કાછીયા જ્ઞાતિ સમાજ લુણાવાડા દ્વારા ગણપતિજીનું ભવ્ય આગમન કરવામાં આવ્યું હતું. આ વર્ષે 38માં વર્ષમાં મંગલ પ્રવેશમાં શ્રીજીની પ્રતિમાનું શહેરના એસ.ટી ડેપો ખાતેથી ડીજેના તાલે વાજતે ગાજતે ભવ્ય શોભાયાત્રા યોજી આગમન કરાયું હતું. આ શોભાયાત્રા એસ.ટી ડેપો ખાતેથી નીકળી લુણાવાડા શહેર મુખ્ય હાઇવે ચાર રસ્તા થઈ પરશુરામ ચોક થઈ છપૈયા ધામ સોસાયટી પહોંચી હતી. રસ્તામાં અલગ અલગ જગ્યાએ આતશબાજી કરી ભવ્ય આગમન કરાયું હતું. આ આગમન યાત્રામાં લુણાવાડા કાછીયા સમાજ સહિત ખૂબ મોટી સંખ્યામાં નગરની ધર્મપ્રેમી જનતા જોડાઈ હતી.