મુખ્ય પ્રધાન અરવિંદ કેજરીવાલને સંડોવતા કથિત એક્સાઇઝ કૌભાંડ કેસમાં વ્યક્તિઓ સામે કાર્યવાહી કરવા માટે જરૂરી મંજૂરી મેળવવા માટે દિલ્હીની રાઉઝ એવન્યુ કોર્ટે સીબીઆઇને વધારાના ૧૫ દિવસનો સમય આપ્યો છે. વિશેષ ન્યાયાધીશ કાવેરી બાવેજાએ સીબીઆઈને આ મંજૂરી મેળવવા માટે ૨૭ ઓગસ્ટની તારીખ નક્કી કરી છે. કારણ કે કેટલાક કેસ હજુ પેન્ડિંગ છે. ૮ ઓગસ્ટના રોજ, જજે કેજરીવાલની ન્યાયિક કસ્ટડી ૨૦ ઓગસ્ટ સુધી લંબાવી હતી જ્યારે તે વીડિયો કોન્ફરન્સિંગ દ્વારા કોર્ટમાં હાજર થયા હતા.
બીજી તરફ મુખ્ય પ્રધાન અરવિંદ કેજરીવાલે દારૂ કૌભાંડ કેસમાં જામીન માટે સુપ્રીમ કોર્ટનો સંપર્ક કર્યો હતો. આમ આદમી પાર્ટીની લીગલ ટીમે સોમવારે આ જાણકારી આપી. એવું કહેવામાં આવ્યું હતું કે કેજરીવાલે આ કેસમાં સીબીઆઈ દ્વારા ધરપકડને પણ પડકારી છે.
ઉલ્લેખનીય છે કે તાજેતરમાં જ કેજરીવાલે સીબીઆઈ દ્વારા કરાયેલી ધરપકડને દિલ્હી હાઈકોર્ટમાં પણ પડકારી હતી. જોકે ત્યાં પણ તેને રાહત મળી ન હતી. હાઈકોર્ટે ૫ ઓગસ્ટે કેસમાં કેજરીવાલની ધરપકડને યોગ્ય ઠેરવી હતી.
કોર્ટે કહ્યું હતું કે સીબીઆઈની કાર્યવાહી દુષ્ટતાથી પ્રેરિત નથી અને તે સાબિત કરે છે કે આપ સુપ્રીમો સાક્ષીઓને કેવી રીતે પ્રભાવિત કરી શકે છે જે તેમની ધરપકડ પછી જ જુબાની આપવા માટે હિંમત એકત્ર કરી શકે છે. કેજરીવાલની ધરપકડને યથાવત રાખતા હાઈકોર્ટે તેમને પહેલા જામીન માટે નીચલી કોર્ટનો સંપર્ક કરવા કહ્યું હતું.