ગોધરા નગરપાલિકા વિસ્તારમાં ગાંધીચોક, એસ.ટી.સ્ટેન્ડ, ભુરાવાવ, વાવડીબુઝર્ગ, બામરોલી રોડ તથા ગદુકપુર ચોકડી ખાતે જાહેર રસ્તા ઉપર રખડતા ઢોરોને પકડવા માટે ઢોર ડબ્બા સાથે ડ્રાઈવ યોજવામાં આવી હતી. ડ્રાઈવમાં પ્રાંત અધિકારી પ્રવિણસિંહ જૈસાવત, ગોધરા પાલિકા ચીફ ઓફિસર આર.એચ.પટેલ, સેનેટરી ઈન્સ્પેકટર સુરપાલસિંહ સોલંકી, અને રમેશ મહેતા, ટ્રાફિક વિભાગ, પોલીસ વિભાગના કર્મચારીઓ, અધિકારીઓ સહિત 70 થી વધુ કર્મચારીઓ જોડાયા હતા. શહેરના રસ્તા પર રખડતા નાના-મોટા મળી કુલ 45 ઢોરોને પકડીને પરવડી ખાતે આવેલ ગોૈશાળા ખાતે મોકલી આપ્યા હતા. આ સાથે તંત્ર દ્વારા સદર ઢોરના માલિકો સામે કાયદેસરની કાર્યવાહી હાથ ધરવામાં આવનાર છે. ડ્રાઈવ દરમિયાન બે ઈસમો કે જેઓ આ ડ્રાઈવ દરમિયાન પશુઓને ભગાડી જઈ અને કામગીરીમાં અવરોધ બનતા તેઓને ઝડપી પાડી તેમની સામે પોલીસ ફરિયાદ દાખલ કરવાની કાર્યવાહી હાથ ધરવામાં આવી હતી.