ડેમોક્રેટ કમલા હેરિસની લોકપ્રિયતા સતત વધી રહી છે અને રાષ્ટ્રપતિ પદ માટે કરવામાં આવેલા તાજેતરના મતદાનમાં તેણે ડોનાલ્ડ ટ્રમ્પને પાછળ છોડી દીધા છે. ગુરુવારે જાહેર કરાયેલા પોલમાં કમલા હેરિસને ૪૨ ટકા લોકોનું સમર્થન મળ્યું છે, જ્યારે ડોનાલ્ડ ટ્રમ્પ પાંચ પોઈન્ટથી પાછળ છે અને ૩૭ ટકા લોકોની પસંદ છે.
જુલાઈમાં થયેલા સર્વેમાં કમલા હેરિસને ૩૭ ટકા લોકોએ સમર્થન આપ્યું હતું. જ્યારે ડોનાલ્ડ ટ્રમ્પને ૩૪ ટકા લોકોનું સમર્થન મળ્યું છે. હવે તાજા સર્વેના પરિણામો પરથી સ્પષ્ટ થાય છે કે જેમ જેમ ચૂંટણી પ્રચાર આગળ વધી રહ્યો છે તેમ કમલા હેરિસની લીડ પણ મજબૂત બની રહી છે. રાષ્ટ્રીય સ્તરે હાથ ધરવામાં આવેલા નવીનતમ સર્વેક્ષણમાં ૨૦૪૫ પુખ્તોએ ભાગ લીધો હતો. આ સર્વે ૨-૭ ઓગસ્ટ વચ્ચે કરવામાં આવ્યો હતો. સર્વેમાં ચાર ટકા લોકોએ અપક્ષ ઉમેદવાર રોબર્ટ કેનેડી જુનિયરને સમર્થન આપ્યું હતું. જો કે જુલાઈમાં થયેલા સર્વેમાં કેનેડી જુનિયરને ૧૦ ટકા લોકોનું સમર્થન મળ્યું હતું.
ડોનાલ્ડ ટ્રમ્પ અને તેમની ટીમ પણ કમલા હેરિસની વધતી લોકપ્રિયતાથી ચિંતિત છે. આ કારણે ટ્રમ્પ સતત કમલા હેરિસ અને તેમની લાયકાત પર સવાલ ઉઠાવી રહ્યા છે. તાજેતરમાં જ ટ્રમ્પે કમલા હેરિસ વિરુદ્ધ જાતિવાદી ટીપ્પણી કરી હતી અને તેના અશ્વેત મૂળના હોવા અંગે સવાલો ઉઠાવ્યા હતા. હવે ટ્રમ્પે કહ્યું છે કે સમગ્ર વિશ્ર્વમાં સ્થિતિ વણસી રહી છે અને વિશ્ર્વ વિશ્ર્વ યુદ્ધ તરફ આગળ વધી રહ્યું છે. ટ્રમ્પે કહ્યું કે કમલા હેરિસ પરિસ્થિતિને સંભાળવામાં સક્ષમ નથી. ટ્રમ્પે કમલા હેરિસને બિડેન કરતા પણ ખરાબ ઉમેદવાર ગણાવ્યા હતા.
તાજેતરમાં સુધી ડોનાલ્ડ ટ્રમ્પ પ્રમુખપદની રેસમાં અગ્રેસર જણાતા હતા. ખાસ કરીને પેન્સિલવેનિયામાં તેમના પર થયેલા જીવલેણ હુમલા બાદ ટ્રમ્પ પ્રત્યે સહાનુભૂતિની લહેર હતી. જો કે, બિડેને પ્રમુખપદની રેસમાંથી પીછેહઠ કરી અને કમલા હેરિસને ટેકો આપ્યા પછી પરિસ્થિતિ બદલાઈ ગઈ અને હવે કમલા હેરિસ ટ્રમ્પને ઢાંકી રહી હોય તેવું લાગે છે.