દાહોદ જીલ્લાના ઝાલોદ તાલુકામાં આવેલ માછણનાળા ડેમમાંથી એક અજાણી યુવતીનો મૃતદેહ મળી આવતાં વિસ્તારમાં ચકચાર મચી જવા પામી છે. ઘટનાની જાણ સ્થાનીક પોલીસને થતાં પોલીસ ઘટના સ્થળે પહોંચી તપાસનો ધમધમાટ આરંભ કર્યાનું જાણવા મળે છે.
ઝાલોદના લીમડી નજીક આવેલ માછણનાળા ડેમમાં આજરોજ એક અજાણી વ્યક્તિનો મૃતદેહ ડેમના પાણીમાં તરતો જોવા મળતાં સ્થાનીકોના લોકટોળા ડેમ તરફ ઉમટી પડ્યાં હતાં. ઘટનાની જાણ સ્થાનીક પોલીસને કરવામાં આવતાં સ્થાનીક પોલીસનો કાફલો પણ ઘટના સ્થળે રવાના થઈ ગયો હતો. પોલીસે તરવૈયાઓની મદદથી મૃતદેહને ડેમના પાણી માંથી બહાર કાઢવામાં આવ્યો હતો. ત્યારે મૃતદેહ યુવતીનો હોવાનું સામે આવ્યું હતું. પોલીસે મૃતદેહનો કબજો લઈ નજીકના દવાખાને પીએમ માટે રવાના કરી દેવામાં આવ્યો હતો. અજાણી યુવતી કોણ હશે ? તે અહીં કેવી રીતે આવી પહોંચી ? યુવતી ક્યાંની હશે ? યુવતીએ આત્મહત્યા કરી હશે ? કે પછી કોઈકે તેની હત્યા કરી ડેમના પાણીમાં નાંખી દીધી હશે ? જેવા અનેક સવાલો સાથે સ્થાનીક પોલીસે તપાસ હાથ ધરી છે.