- ફતેપુરાના કારોડીયા પૂર્વ ડેપ્યુટી સરપંચ દ્વારા ગામના યુવાનને જાનથી મારી નાખવાની ધમકી અપાતાં પોલીસમાં લેખિત અરજી અપાઇ.
કેટલાક બની બેઠેલા રાજકારણી લોકો પોતાની રાજકારણમાં મોટા નેતાઓ સાથે લાંબી પહોચ હોવાની ગુલબાંગો ઠોકી આમ પ્રજાને ધમકાવવાના કિસ્સા બનતા રહે છે. તેવી જ રીતે ફતેપુરા નગરમાં રહેતા એક યુવાનને કરોડીયા પૂર્વ ગ્રામ પંચાયતના ડેપ્યુટી સરપંચ દ્વારા મોટા રાજકારણીઓ સાથે પોતાને સારા સંબંધો હોવાનું જણાવી યુવાનને ગમે ત્યારે ઉઠાવી જઈ, ઉડાવી દેવાની ધમકી આપતા પીડિત યુવાને ફતેપુરા પોલીસ સ્ટેશનમાં લેખિતમાં અરજી આપી હોવાનું જાણવા મળે છે.
દાહોદ જીલ્લાના ફતેપુરા નગરમાં રહેતા કલાલ મનોજકુમાર નરેશભાઈનાઓએ ફતેપુરાના કરોડિયા પૂર્વ ગ્રામ પંચાયતના ડેપ્યુટી સરપંચ કલાલ હિતેશભાઈ નટવરલાલની વિરૂદ્ધમાં લેખિત ફરિયાદ આપતા જણાવ્યું હતું કે, મનોજકુમાર કલાલને હિતેશ કલાલ સાથે કોઈપણ જાતની લેવા દેવા કે અદાવત નથી. તેમ છતાં અવાર-નવાર હિતેશ કલાલ દ્વારા મનોજ કલાલને મારી નાખવાની ધમકીઓ આપતો રહેછે.
તેમજ આ ડેપ્યુટી સરપંચ દ્વારા કેટલીક વાર મનોજભાઈ કલાલને જાતિ અપમાનિત ર્માં-બેન સમાણી બિભિત્સ ગાળો આપી હું તને પતાવી દઈશની ધમકીઓ આપતો રહેતો હોવાનો અરજીમાં ઉલ્લેખ કરવામાં આવ્યો છે. તેવી જ રીતે ગત 12 જુલાઈના રોજ પણ ખુલ્લેઆમ મનોજકુમાર કલાલને ધમકીઓ આપતા જણાવ્યું હતું કે, મારી પહોચ ઘણી લાંબી છે, મારી જોડે દાહોદ જીલ્લાના બહુ મોટા નેતાઓ છે, અને હું તને ગમે ત્યારે ઉઠાવી ઉડાવી દેવડાવીશ તેવી ધમકીઓ આપતા મનોજકુમાર કલાલે ફતેપુરા પોલીસને અરજી આપતા જણાવ્યું હતું કે, પોતાને નાના સંતાનો હોય અને પોતે એકલા હોય અવાર-નવાર કામ અર્થે બહાર નીકળવું પડતું હોય છે .
પોતાને કાંઈ પણ થાય તો તેની જવાબદારી હિતેશ કલાલની રહેશે અને પોતાના ઉપર ગમે ત્યારે હુમલો થાય તેમ હોવાનું જણાવ્યું છે અને વધુમાં જણાવ્યું હતું કે,હિતેશ કલાલ વર્ષ 2002ના કોમી તોફાનોમાં પણ સંડોવાયેલા હોવાના આક્ષેપો અરજીમાં કરવામાં આવેલ છેે. તેમજ હાલમાં પણ હિતેશ કલાલ ખુલ્લી ધાક ધમકીઓ આપવામાં માહિર હોવાનું જણાવ્યું છે. જેથી તેની સામે કાયદેસરની કાર્યવાહી કરવામાં આવે તેવી મનોજ કલાલ દ્વારા લેખિત ફરિયાદમાં કરવામાં આવતા ફતેપુરા પોલીસ હરકતમાં આવતા તાત્કાલિક ગ્રામ પંચાયતના કરોડીયા પૂર્વના ડે સરપંચને પોલીસ દ્વારા લાવી અટકયાદી પગલાં લેવામાં આવ્યા હોવાનું જાણવા મળે છે.