રોહિત શર્માના નેતૃત્વવાળી ટીમ ઈન્ડિયાએ હાલમાં જ ટી૨૦ વર્લ્ડ કપ ૨૦૨૪નો ખિતાબ જીત્યો હતો. ૨૯ જૂનના રોજ બ્રિજટાઉનના કેન્સિન્ગ્ટન ઓવલમાં રમાયેલી ફાઈનલમાં ભારતે સાઉથ આફ્રીકાને ૭ રનથી હરાવી દીધુ હતું. ભારતીય ટીમે બીજીવાર આ ખિતાબ જીત્યો. આ પહેલા ૨૦૦૭ની સીઝનમાં આ ખિતાબ જીત્યો હતો. ખિતાબ જીત્યા બાદ રોહિત શર્માએ ટી૨૦ ઈન્ટરનેશનલમાંથી નિવૃત્તિ જાહેર કરીને ખળભળાટ મચાવી દીધો હતો. હવે રોહિત શર્માના વનડે અને ટેસ્ટ કરિયર ઉપર પણ ચર્ચા થઈ રહી છે.
રોહિત શર્માની ૩૭ વર્ષથી વધુની ઉંમર થઈ ગઈ છે. આવામાં તેઓ હવે વધુ કેટલા વર્ષ સુધી ઈન્ટરનેશનલ ક્રિકેટ રમી શકે છે તે પણ મોટો સવાલ છે. રોહિત શર્મા હાલ વેસ્ટઈન્ડિઝમાં કપ જીત્યા બાદથી બ્રેક પર છે અને શ્રીલંકા સામે પણ ત્રણ વનડે મેચ રમશે નહીં.
જો કે રોહિત શર્માએ સ્પષ્ટ કરી દીધુ છે કે હાલ તેઓ નિવૃત્તિ લેવાના નથી અને ફેન્સ તેમને રમતા જોઈ શકશે. રવિવારે ડલ્લાસમાં એક કાર્યક્રમ દરમિયાન રોહિતને નિવૃત્તિ અંગે સવાલ પૂછવામાં આવ્યો હતો. ભારતીય કેપ્ટને કહ્યું કે તેઓ એવા વ્યક્તિ નથી જે બહુ આગળનું વિચારતા હોય. પરંતુ હજુ પણ તેમનામાં ઘણું બધુ બાકી છે. રોહિતે કહ્યું કે, મેં હમણા જ કહ્યું. હું એટલી દૂરનું વિચારતો નથી. આથી નિશ્ર્ચિત રીતે તમને મને થોડા સમય સુધી રમતા જોશો.
રોહિત શર્માએ ભારતને ૨૦૨૪નો ટી૨૦ વર્લ્ડ કપ અપાવ્યા બાદ ટી૨૦ ઈન્ટરનેશનલમાંથી નિવૃત્તિ જાહેર કરી હતી. રોહિત શર્માની થોડીવાર પહેલા વિરાટ કોહલીએ પણ ટી૨૦ ઈન્ટરનેશનલમાંથી નિવૃત્તિ જાહેર કરી દીધી હતી. વિરાટ, રોહિત બાદ આ યાદીમાં રવિન્દ્ર જાડેજા પણ સામેલ થઈ ગયો.
આ અગાઉ બીસીસીઆઈ સચિવ જય શાહે કહ્યું હતું કે હાલ વિશ્ર્વ ટેસ્ટ ચેમ્પિયનશીપ સત્ર અને આગામી વર્ષ ફેબ્રુઆરી માર્ચમાં રમાનારી ચેમ્પિયન્સ ટ્રોફીમાં રોહિત જ ભારતના કેપ્ટન હશે. રોહિત ટી૨૦ વિશ્ર્વ કપ ૨૦૨૨માં ભારતના કેપ્ટન હતા જેમાં ઈંગ્લેન્ડે સેમીફાઈનલમાં ભારતને હરાવ્યું હતું અને તેના એક વર્ષ બાદ ૫૦ ઓવરના વિશ્ર્વ કપમાં ઓસ્ટ્રેલિયાએ ફાઈનલમાં ભારતને હરાવ્યું હતું. રોહિતની કેપ્ટનશીપમાં ભારતે વેસ્ટ ઈન્ડિઝ અને અમેરિકામાં રમાયેલા ટી૨૦ વિશ્ર્વ કપ ૨૦૨૪માં ખિતાબી જીત મેળવી.
૨૦૦૭માં ટી૨૦ ઈન્ટરનેશનલ ક્રિકેટમાં ડેબ્યુ કરનારા રોહિતને અત્યાર સુધી આયોજિત દરેક ટી૨૦ વર્લ્ડ કપમાં રમવાનું ગૌરવ મળ્યું. આવા તે એકમાત્ર ભારતીય ક્રિકેટર છે. રોહિતે ટી૨૦ વર્લ્ડ કપ ૨૦૨૪ની ૮ મેચમાં ૨૫૭ રન કર્યા હતા જે ભારતીય ખેલાડીની રીતે સૌથી વધુ રહ્યા.
રોહિત શર્માની ટી૨૦ ઈન્ટરનેશનલ કરિયર ૧૫૯ મેચ, ૪૨૩૧ રન, ૩૨.૦૫ એવરેજ, ૫ સદી, ૩૨ અડધી સદી, ૧૪૦.૮૯ સ્ટ્રાઈક રેટ, ૩૮૩ ચોગ્ગા, ૨૦૫ છગ્ગા
રોહિત શર્માની વનડે ઈન્ટરનેશનલ કરિયર, ૨૬૨ મેચ, ૧૦૭૦૯ રન, ૪૯.૧૨ એવરેજ, ૩૧ સદી, ૫૫ અડધી સદી, ૯૧.૯૭ સ્ટ્રાઈક રેટ, ૯૯૪ ચોગ્ગા, ૩૨૩ છગ્ગા
રોહિત શર્માની ટેસ્ટ કરિયર, ૫૯ મેચ, ૪૧૩૭ રન, ૪૫.૪૬ એવરેજ, ૧૨ સદી, ૧૭ અડધી સદી, ૫૭.૦૫ સ્ટ્રાઈક રેટ, ૪૫૨ ચોગ્ગા, ૮૪ છગ્ગા