હૈદરાબાદના સાંસદ અસદુદ્દીન ઓવૈસીએ મોદી સરકારના સબકા સાથ, સબકા વિકાસના નારા પર આકરા પ્રહારો કર્યા હતા. રાષ્ટ્રપતિના સંબોધન પર બોલતા ઓવૈસીએ કહ્યું કે ૪ જૂનથી અત્યાર સુધીમાં દેશના ૬ મુસ્લિમોને ટોળાએ માર માર્યો છે. ૧૧ મુસ્લિમોના મકાનો તોડી પાડવામાં આવ્યા છે, પરંતુ સરકાર મૌન છે.
લગભગ ૮ મિનિટના પોતાના ભાષણમાં ઓવૈસીએ ઈઝરાયેલ અને પેલેસ્ટાઈનનો મુદ્દો પણ ઉઠાવ્યો હતો. તેમણે કહ્યું કે વર્તમાન કેન્દ્ર સરકાર પેલેસ્ટાઈનીઓને મારવા માટે ઈઝરાયેલને હથિયારો આપી રહી છે.
હૈદરાબાદના સાંસદ ઓવૈસીએ પણ ૨૦૨૪ના ચૂંટણી પરિણામો પર ટિપ્પણી કરી હતી. તેમણે કહ્યું કે નરેન્દ્ર મોદીને ૨૦૨૪માં જે જીત મળી છે તે માત્ર હિન્દુત્વના કારણે જ મળી છે. તેમનું સમગ્ર રાજકારણ મુસ્લિમોને નફરત પર આધારિત છે.
ઓવૈસીએ આ દરમિયાન બેરોજગારીનો મુદ્દો પણ ઉઠાવ્યો હતો. તેમણે કહ્યું કે આજે દેશના અડધાથી વધુ યુવાનો બેરોજગાર છે અને સરકાર આ તરફ ધ્યાન આપતી નથી. પેપર લીકના કારણે છેલ્લા ૫ વર્ષમાં ૬૫ લાખ લોકોની કારકિર્દી મુશ્કેલીમાં છે.
હૈદરાબાદના સાંસદે વધુમાં કહ્યું કે બનારસના વણકર કામદારો મંદીનો સામનો કરી રહ્યા છે. અહીંના વણકરોને હવે સુરતમાં સ્થળાંતર કરવાની ફરજ પડી છે.
ઓવૈસીએ સંસદમાં કેન્દ્ર સરકારને પૂછ્યું કે ભારત ઈઝરાયેલને કેમ મદદ કરી રહ્યું છે? તેમણે કહ્યું કે ભારત ઇઝરાયલને હથિયારોના કન્સાઇનમેન્ટ મોકલી રહ્યું છે અને તે હથિયારોની મદદથી ઇઝરાયેલ પેલેસ્ટાઇનના લોકોની હત્યા કરી રહ્યું છે. તમે પેલેસ્ટાઈનને લઈને આ પ્રકારની નીતિ કેમ અપનાવી રહ્યા છો?
ઓવૈસીએ વધુમાં કહ્યું કે મોદી સરકાર ભારતમાં એક કેમ્પ લગાવી રહી છે, જ્યાં લોકોને પસંદ કરીને યુદ્ધ માટે ઈઝરાયેલ મોકલવામાં આવી રહ્યા છે. રશિયા માટે પણ આ જ કામ કરવામાં આવી રહ્યું છે. આ ખોટું છે અને સરકારે આનો જવાબ આપવો પડશે. તેમણે સરકારને કહ્યું કે તમારી રણનીતિના કારણે ગલ્ફ દેશોમાં રહેતા ૯૦ લાખ લોકોમાં ભયનું વાતાવરણ છે. પોતાના સંબોધન દરમિયાન ઓવૈસીએ કહ્યું કે ૪ જૂન પછી દેશમાં મોબ લિંચિંગની ૬ ઘટનાઓ બની છે, પરંતુ આના પર કોઈ બોલવા તૈયાર નથી. આપણે કેવા પ્રકારનું ભારત બનાવી રહ્યા છીએ?
ઓવૈસીએ મુસ્લિમોના ઘરો પર બુલડોઝર ચલાવવાનો મુદ્દો પણ બનાવ્યો હતો. તેમણે કહ્યું- છેલ્લા એક મહિનામાં દેશમાં મુસ્લિમોના ૧૧ મકાનો તોડી પાડવામાં આવ્યા છે. આ મકાનો મઘ્યપ્રેદશ અને હિમાચલમાં તોડી પાડવામાં આવ્યા છે.ર્સ્
અસદુદ્દીન ઓવૈસીએ વધુમાં કહ્યું કે દેશમાં મુસ્લિમોને હિસ્સો પણ નથી મળી રહ્યો. ભારતમાં મુસ્લિમોની વસ્તી લગભગ ૨૦ ટકા છે, પરંતુ સંસદમાં તેમનો હિસ્સો લગભગ ૪ ટકા છે.
ઓવૈસીએ પોતાના સંબોધનમાં કહ્યું- ભારતમાં મુસ્લિમો ક્યારેય વોટ બેંક નથી રહી. અત્યારે પણ વડાપ્રધાન મોદી તેમને ઘૂસણખોર કહે છે. ભાજપ માટે મુસ્લિમોનો અભિપ્રાય મહત્વનો નથી.